Compostela, 12 de abril do 2017 – O Bloque Nacionalista Galego ven de reclamarlle a Roberto Castro, concelleiro en Vedra, que renuncie a acta por non identificarse co proxecto do Bloque.
A petición feita pola dirección nacional foille remitida por carta ao concelleiro. Lindeiros quixo concretar o motivo da petición pero o BNG remitiuse a un comunicado escrito nos seguintes termos:
O BNG remitiu hoxe unha carta ao ata agora concelleiro en Vedra Roberto Castro para solicitarlle a renuncia á acta de concelleiro, toda vez que este xa non comparte o proxecto nacionalista que representa o Bloque.
En base a ese afastamento político, a organización solicita a devolución da acta para que corra a lista e poda ocupar a súa responsabilidade unha persoa que si se identifica co proxecto político que o BNG ten para o Concello de Vedra e para o conxunto do país.
Ademais, o Bloque apela tamén ao código ético que asumen todos os cargos electos por esta formación no momento de ir nunha candidatura, neste caso baixo as siglas BNG-Asembleas Abertas, onde expresamente se recolle que “as persoas que exercen cargos públicos comprométense a respectar, con independencia do que ditaren as cuestións legais, o criterio da organización de que as actas pertencen ao BNG e non se conciben sen o apoio do conxunto da militancia”.
