Bisbarra, 3 de outubro do 2022 – O BNG levou unha vez máis ao Parlamento o trazado da AG-59 ao seu paso polo concello de Teo e que afecta tamén ao concello da Estrada.
Os nacionalistas consideran que o actual trazado da AG-59 é unha “agresión”. A parlamentaria Montserrat Prado critica que non se modifique un trazado tremendamente lesivo para o patrimonio, a paisaxe, os sectores produtivos e a convivencia
Prado di que “O PP ten que explicar a que intereses serve ao empeñarse en seguir adiante cun trazado da AG-59 que destrúe patrimonio etnográfico, cultural e paisaxístico, arrasa roteiros e terreos agrarios e divide parroquias”. A deputada nacionalista defendeu unha proposición non de lei no Parlamento para modificar o trazado, tal e como tamén reclama a propia veciñanza, os colectivos afectados e os sectores produtivos, porque “a construción dunha infraestrutura non pode ser a costa de graves afectacións, non pode significar o arrase do territorio e do noso patrimonio”, advertiu.
A proposta do Bloque pasa por retirar o actual proxecto de trazado do subtreito de ampliación da AG-59 entre A Ramallosa (no concello de Teo) e Rollo (no concello da Estrada) e elaborar un novo “que non supoña este nivel de agresión”, para o que tamén propuxo a realización dun catálogo exhaustivo e pormenorizado de todos os elementos medioambientais, patrimoniais, produtivos e residencias, co obxectivo de evitar a súa afectación no novo trazado.
Neste sentido, recordou que o trazado actual non só afecta a un espazo protexido, o sistema fluvial Ulla-Deza da Rede Natura, senón tamén a patrimonio etnográfico de enorme importancia cultural, como os Muíños do Vea, e “arrasa” terreos agrarios en ámbolos dous concellos, en especial en Cora, onde se concentran varias explotacións agrogandeiras que verán diminuída a súa base produtiva.
A isto sumou a afectación de múltiples bens patrimoniais no val de Santa Lucía, a do Camiño da Geira e dos Arrieiros (que descorre entre Braga e Santiago de Compostela e que foi posto en valor pola asociación Codeseda Viva) e tamén a división de parroquias, o que implica un impacto tamén sobre a súa habitabilidade, xa que o trazado discorre moi preto das casas en lugares como no Rollo.
A deputada nacionalista advertiu que o trazado deste proxecto “non está pensado para dinamizar a economía de ambos concellos senón que, ao contrario, afecta gravemente á mesma, nin sequera comunica o polígono industrial de Toedo e, por se fose pouco, supón un problema de seguridade vial xa que este subtreito remata nunha forte pendente na recta de Baloira”.
