Bisbarra, 26 de decembro do 2022 – O Bloque Nacionalista Galego de Ordes denuncia a caída de balos no Camiño Inglés e culpan ás intervencións realizadas en outubro.
O BNG tacha de “agresión” as intervencións efectuadas no Camiño Inglés no pasado mes de outubro. Explican que os derrubes producidos impiden o tránsito e forman acumulacións de auga no trazado.
As intervencións foron realizadas pola Axencia de Turismo de Galicia. O BNG as cualificou en aquel momento como unha agresión e as consideraron “innecesaria nun dos poucos tramos nos que se conserva a corredoira cos seus valos e arborado autóctono”
Ante o estado que presenta o citado tramo do Camiño Inglés, o BNG de Ordes a través do seu portavoz Pablo Vidal, ven de rexistrar unha moción no concello esixindo ao goberno da Xunta de Galiza “a depurar responsabilidades e levar a cabo as medidas precisas para que esta situación non volva a repetirse nunca mais”.
Na iniciativa, os nacionalistas tamén procuran convidar á “Asociación de Concellos do Camiño Inglés, a posicionarse sobre o acontecido”. A este respecto, Vidal apunta que “somos conscientes de que a responsabilidade recae na Xunta de Galiza, pero cremos que a imaxe e lexitimidade da asociación quedaría seriamente danada si se deixa de lado a defensa do referente turístico e patrimonial que supón o Camiño Inglés”.
Segundo opina Pablo Vidal, o acontecido seguramente teña orixe en que “as obras debilitaron as bases dos valos pola retirada dos materiais existentes, problema que se agravou ao conducir as augas a través das canalizacións efectuadas próximas ás bases dos valos e que seguramente provocaron o arrastre de mais material”.
Así mesmo, o portavoz do BNG de Ordes lamenta que “estamos a falar da destrución dun dos elementos mais destacados do patrimonio do noso concello, de moi difícil recuperación, e que levaba moitos anos sen acusar problemas no seu estado natural”.
