Bisbarra, 3 de marzo do 2023 – O Bloque Nacionalista Galego reclama da Xunta de Galicia a posta en valor do Castro Valente cun plan de investigación e unha escavación ante a ameaza dos eólicos.
O BNG mantivo unha reunión sobre Castro Valente na que participaron as deputadas Iria Carreira e Montse Prado e o deputado Luís Bará, a portavoz municipal en Padrón, Bea Rei, a portavoz na Estrada, Susana Camba, o candidato nacionalista á alcaldía da Estrada Xoán Reices e militantes da organización dos dous concellos.
A reunión, que tivo lugar en Herbón próximo ao xacemento arqueolóxico, tivo como obxectivo avaliar as accións a levar a cabo en relación co parque eólico de Castro Valente. Os nacionalistas demandan da Xunta que denegue a autorización do proxecto de Iberdrola. situado nos concellos de Padrón e A Estrada, que conta con declaración de impacto ambiental favorábel e está pendente de aprobación polo goberno galego.
A delegación nacionalista escolleu para esta xuntanza a igrexa románica de Santa María de Herbón por tratarse dun Ben de Interese Cultural que se ve afectado polo impacto visual do parque eólico, tal como recoñece o informe do Instituto de Estudos do Territorio. Este organismo propón a instalación dunha pantalla vexetal para protexer o ben, solución absolutamente disparatada e irrealizábel.
O BNG considera absolutamente inxustificado e aberrante que nos informes da Dirección Xeral do Patrimonio Cultural non se faga referencia ao xacemento arqueolóxico de Castro Valente e aos impactos que tería a construción do polígono eólico nesta fortificación datada entre finais da época romana e a Alta Idade Media.
Segundo o grupo nacionalista, as investigacións e prospeccións recentes dirixidas polos arqueólogos Mario Fernández Pereiro e José Carlos Sánchez Pardo confirman a relevancia e interese do xacemento de máis de 10 hectáreas rodeado por una monumental muralla de máis de 1,2 km de lonxitude. Un dos aspectos máis destacados deste recinto único é o seu emprazamento e o control visual sobre a Depresión Meridiana e o Val do Ulla, valores que resultarían moi afectados pola construción do polígono eólico.
Atendendo a todas estas consideracións, o BNG acordou desenvolver unha campaña para evitar a aprobación deste proxecto que tería un elevado impacto nos valores históricos e patrimoniais da contorna. Nesta liña, rexistraranse iniciativas nos concellos e no parlamento galego para demandar que a Xunta denegue a autorización do parque eólico polas deficiencias do trámite de avaliación ambiental e polo impacto crítico no xacemento arqueolóxico de Castro Valente e na súa contorna de protección.
Ademais, o grupo nacionalista demanda á Xunta que impulse e financie, en colaboración co sistema universitario galego, un proxecto para a investigación, prospección arqueolóxica, conservación e divulgación do xacemento arqueolóxico de Castro Valente.
