Bisbarra, 14 de setembro do 2022 – Os problemas de transporte escolar tomaron vacacións como os cativos pero co comezo do curso lonxe de solucionarse parecen crecer.
O mes de xuño remataba con queixas en varios concellos da bisbarra e con situacións surrealistas como o uso de vehículos de aluguer para substituír aos buses tal e como contabamos en este artigo. A parlamentaria socialistas Noa Díaz levará a cuestión ao Parlamento de Galicia este venres.
Demanda de informe e inspeccións
Díaz levará á cámara galega os problemas no transporte escolar dos concellos de Teo, A Baña, Negreira, Dodro e O Pino. Demanda un informe de “inspección de rutas, horarios, parladas e vehículos dispoñibles”. Por outra banda reclamará que as concesionarias cumpran de xeito íntegro os contratos.
Díaz denuncia o desleixo da Xunta e explica que a situación provocou que os nenos e nenas perderan tempo das súas clases nas primeiras xornadas do curso, ademais da “inseguridade constante que provocan nas familias”, obrigadas a agardar na rúa polo transporte.
A policía local de Teo realiza inspeccións
A situación no concello de Teo provocou tantas queixas que este martes a Policía Local realizou inspeccións nos autobuses do IES de Cacheiras para “comprobar a situación na que se fai o traslado dos rapaces e garantir a seguridade de todos eles”.
Noa Díaz tamén pon como exemplo ao concello de Teo. Explica que “houbo liñas que directamente non chegaron, deixando a decenas de rapaces e rapazas nas paradas. Outras liñas pasaron polas paradas cunha hora de retraso, e mesmo houbo casos nos que a concesionaria enviou furgonetas VTC no lugar dos buses”.
Unha usuaria do IES de Cacheiras preguntábase nas redes sociais “por que teño que saír do traballo para levar ao meu fillo ao instituto si hai bus escolar?”.
Outros concellos
A parlamentaria socialistas explica tamén que “en A Baña a ruta chegou tarde e con moitos rapaces e rapazas de pé, xa que o vehículo que enviaron era de 20 prazas para unha liña utilizada por 30 menores”. No Concello de Dodro, engade, “o autobús que leva aos escolares a Padrón chegou tarde”, mentres no Concello de O Pino, a liña que empregan os estudantes para achegarse aos institutos de Santiago “fixo a ruta cunha hora de retraso”.
Noa Díaz advirte de que “sabemos que a moitos dos condutores e condutoras dos autobuses desas liñas lles comunicaron as rutas pasadas as once da noite do día anterior, e ademais moitos deles descoñecían os lugares polos que discorren”.
