O investimento FEDER será do 60% dos proxectos en tódolos casos. Co investimento que aportarán os concellos chegarase a máis de 46 millóns de inversión pública.
A bisbarra beneficiarase dos fondos europeos Feder e transformará algúns dos seus espazos urbanos. Compostela é a que acadou a maior inversión, máis de 8 millóns de euros, e servirá para transformar o noroeste da cidade.
Ames presentou un proxecto que inclúe una estratexia alimentaria Km 0 co novo mercado de abastos, a creación dun banco de terras e a formación dos produtores. Hai que engadir unha senda ciclista que conecte o Milladoiro co rural o a implantación dun transporte público.
No caso da Estrada os fondos iran destinados na súa totalidade ao rural. A intención é humanizar e dotar de servizos e alcalde e arquitecto técnico levan tempo visitando e analizando que zonas serán prioritarias. Mellora nas cunetas e substitucións por sendas peonís, instalación de mobiliario urbano, canalizacións de pluviais e a construción dun centro de servizos sociais son algúns dos proxectos.
Ribeira pola súa banda presentou o proxecto Ribeira Atlántica 2030. O financiamento servirá para reformar o barrio de Banda ó Río convertendo a nave de Cerqueira nun novo espazo social de eventos, a construción dun novo museo ligado ao mundo do mar e un centro Multiusos enfocado en promover a convivencia veciñal. Por outra banda ampliarase e transformarase a praza de Pontevedra, integrándoa co parque de Pedra Pateira ademais da construción dun parking subterráneo para 250 prazas.
Compostela
O Plan de acción integral (PAI) Horizonte Compostela é o que máis financiamento acada superando os oito millóns de euros e presentando un proxecto moi detallado.
A alcaldesa, Goretti Sanmartín, explicou que “Suporá investir 14,5 millóns na transformación da zona noroeste da cidade para reverter a situación de vulnerabilidade e menor dinamismo”.
Zonas como a Almáciga, Vite e Salgueiriños serán as beneficiadas dos fondos. Sanmartín lembra que o Concello xa está actuando neste ámbito con obras como a reurbanización da rúa García Lorca e ten proxectadas outras accións, como a rehabilitación de cinco edificios municipais en Caramoniña.
O PAI Horizonte Compostela inclúe tres grandes proxectos : Santiago Transforma (enfocado á creación de novos equipamentos sociais, culturais e deportivos e vivenda dotacional), Santiago Accesible (orientado á accesibilidade urbana, desde un punto de vista integral) e Santiago Resiliente. (centrado na adaptación ao cambio climático).
As actuacións responden a necesidades funcionais e xerarán contornas máis habitables, resilientes e socialmente equitativas, contribuíndo de maneira significativa aos desafíos que propón a Axenda Urbana Santiago de Compostela (EDIL-AUS) aprobada polo pleno municipal en setembro de 2022, referidos a aspectos como o acceso á vivenda, conservación do patrimonio natural, fortalecemento dos ecosistemas sociais e culturais ou saneamento e abastecemento, entre outros.
