займ срочно

Os Reis chegan a toda a bisbarra, como magos que son

0

Bisbarra, 4 de xaneiro do 2024 – Se algún cativo dubida de que os Reis son Magos poden ensinarlle este artigo xa que a capacidade de estar en toda a bisbarra este venres non a ten calquera.

É unha das ilusións coas que este mundo dixitalizado non conseguiu acabar. Cada cinco de xaneiro os Reis Magos chegan a toda a bisbarra de distintos modos e por un momento os rapaces cren que os soños faranse realidade.

É certo que as veces a bicicleta troca en patinete ou que a consola de videoxogos non é exactamente igual á que se lle pediu pero hai que entender que son millóns de rapaces en todo o mundo e algún erro poderán ter, son magos pero humanos.

Compostela

É a máis grande e espectacular, non ten o encanto da proximidade pero as sorpresas están garantidas. Gaspar, Melchor e Baltasar sairán ás 17 horas da praza de Nosa Señora da Mercé de Conxo e percorrerán a avenida de Ferrol e cruzarán Romero Donallo para continuar Frei Rosendo Salvado ata a praza Roxa. Despois seguirán pola rúa de República do Salvador, rúa do Hórreo e rodearán a praza de Galicia para entrar na zona vella pola Porta Faxeira e seguir pola rúa do Vilar ata a praza do Obradoiro onde está previsto que sexan recibidos pola alcaldesa e por membros da Corporación municipal entre as 18:30 e as 19 horas. A continuación dirixirán unhas palabras á cativada e pasarán ao Salón Vermello do Pazo de Raxoi para a tradicional recepción.

Ames

Os Reis están pasando tres días en Ames escoitando os desexos dos máis pequenos. Nos pavillóns de Milladoiro e Bertamiráns ofreceron recepción onte e hoxe farán o mesmo.

Mañá venres pola mañá, as Súas Maxestades visitarán as parroquias do municipio para que a súa maxia chegue a todos os recunchos do concello. Xa pola tarde, percorrerán as rúas do Milladoiro e de Bertamiráns coas súas cabalgatas. O fin de festa reunirá a grandes e pequenos nos pavillóns municipais para despedir ás Súas Maxestades de Oriente e desfrutar dunha merenda amenizada cun espectáculo de animación infantil.

Padrón

A capital do Sar recibirá á comitiva real ás 17.00 horas pola N-550 para compartir sorrisos, ilusión e sobre todo moita maxia entre a cativada da vila. A cabalgata pasará pola Avenida de Compostela; As Lágrimas; o paseo do Espolón; ata chegar a igrexa de Santiago onde as Súas Maxestades visitarán o Belén vivinte e realizarán a tradicional ofrenda ao neno Xesús.

Recepción dos Reis Magos á cativada no pavillón polideportivo do Souto.

Tras esta primeira parada, Melchor, Gaspar e Baltasar acudirán ata a casa consistorial onde serán recibidos pola Corporación Municipal.

O percorrido rematará de novo neste 2024 no polideportivo do Souto, onde os Reis Magos de Oriente terán a oportunidade de ter un contacto máis directo con todos os nenos e nenas de Padrón que queiran falar con eles para trasladarlles as súas peticións e as súas cartas. Haberá agasallos para todas as crianzas.

Frades

Os Reis Magos chegarán a Frades este venres 5 de xaneiro, onde a partir das 16:00 horas participarán nunha cabalgata polas rúas de Ponte Carreira e despois tomarán parte nunha gran festa de Reis no polideportivo municipal, de 17:00 a 20:00 horas.

As Súas Maxestades chegarán en pick-up acompañados por varias mascotas e percorrerán o centro de Ponte Carreira. Tras ese primeiro contacto coa rapazada, a comitiva partirá cara o polideportivo municipal de Ponte Carreira acompañada polas persoas asistentes. Á entrada do polideportivo municipal haberá un canón de neve, onde os nenos e nenas poderán xogar mentres Melchor, Gaspar e Baltasar preparan a súa entrada nas instalacións, que terá lugar en torno ás 17:00 horas.

Brión

Os Reis Magos visitarán Brión este venres 5 de xaneiro nun autobús de época que percorrerá as distintas parroquias entre as 10:15 e as 20:15 horas. O percorrido e os puntos de encontro serán os mesmos do ano pasado:

  • 10:15 h. Local Social de CORNANDA
  • 10:45 h. Adro da Igrexa da LUAÑA
  • 11:30 h. Adro da Igrexa de VICESO
  • 12:30 h. Adro da Igrexa de ONS
  • 13:15 h. Parada do transporte escolar de Tembra – BOULLÓN
  • 16:30 h. Adro da Igrexa de BASTAVALES
  • 17:30 h. Entorno da Capela de SAN SALVADOR
  • 18:00 h. Campo de San Ramón – O TREMO
  • 19:00 h. Adro da Igrexa dos ÁNXELES
  • 20:00 h. Contorna da Carballeira de Santa Minia – BRIÓN

En cada parroquia a rapazada poderá falar durante uns minutos cos Reis Magos, entregarlles as súas cartas e pedirlles os seus agasallos. Melchor, Gaspar e Baltasar irán acompañados por unha comitiva con música de charanga e que repartirá chocolate con rosca a todas as persoas que se acheguen.

Lousame

Dúas oportunidade de estar con Reis en Lousame A primeira cita terá lugar de 10:30 a 14:00 horas na Casa da Cultura de Lousame. A recepción dos Reis Magos seguirá o mesmo procedemento de edicións anteriores: Melchor, Gaspar e Baltasar estarán no escenario do auditorio e escoitarán/recollerán as cartas dos pequenos, aos que entregarán algunhas lambonadas.

Finalmente, de 17:00 a 20:00 horas, a comitiva real desprazarase ata o polideportivo municipal Pilar Barreiro Senra, onde terá lugar o tradicional Festival de Reis. Unha festa infantil con xogos, inchables, obradoiros… e un chocolate con churros para todas as persoas participantes. Inscricións de balde en www.bandoticket.com.  

Boqueixón

A Casa da Cultura de Camporrapado acollerá este venres 5 de xaneiro a tradicional Festa de Reis do Concello de Boqueixón. Un evento que dará comezo ás 17:00 horas, coa posta en escena do conto “Un Nadal Máxico”, a cargo dos Bolechas, populares personaxes creados por Pepe Carreiro.

“Os Bolechas. Un Nadal Máxico” conta a historia dunha das irmás Bolechas, Loli, unha aprendiz de maga que tratará de traer de volta aos seus irmáns desaparecidos coa axuda da súa variña máxica, do supermago Danubio e dos rapaces e rapazas de Boqueixón. Ao rematar a obra, dará comezo a tradicional recepción de Melchor, Gaspar e Baltasar, que incluirá un sorteo de agasallos en colaboración con SBC Gasolineras. E ás 18:45 horas haberá un segundo pase para as familias que non quixeran ver aos Bolechas.

O Pino

Unha visita ás parroquias formará parte do percorrido dos Reis Magos en O Pino. Os principais puntos de encontro serán os campos da festas parroquias, excepto en Castrofeito, que chegarán un ano máis á Escola de Santiso, e en San Miguel de Cerceda, coa recepción na Igrexa.

O percorrido comezará en Pereira ás 10.45 horas, pasando ao longo da mañá por Castrofeito (11.10 h.), Budiño (11.35 h.), O Pino (12.00 horas), Gonzar (12.20 h.), Medín (13.00 h.), Pastor (13.30 h.) e Lardeiros, ás 13.50 horas.

Xa pola tarde, a comitiva retomará o itinerario ás 17.30 horas na parroquia de San Breixo, para continuar por San Mamede (17.45 h.), San Miguel de Cerceda (18.05 h.) e Cebreiro (18.30 horas).

Ás 19.30 horas a cita será no polideportivo municipal de Reboredo, en Arca, onde terá lugar a recepción oficial.

ARZUA

Os Reis Magos visitarán Arzúa a partir das catro e media da tarde comezando pola Residencia San José. Ás 17:00 Inicio das actividades infantís no Multiusos Terra do Queixo e ás 17:30 Saída da Cabalgata dende a Casa da Cultura con percorrido polas rúas: Santiago, Praza de Galiza, Lugo, Fraga do Rei, Ramón Franco e Xosé Neira Vilas. Regreso polas rúas Xosé Neira Vilas, Ramón Franco e Padre Pardo.

Ás 18:30 Chegada ao Multiusos Terra do Queixo, recepción e reparto de agasallos para ás 21:00 rematar coas actividades infantís.

MELIDE

Desde as cinco e media da tarde os Reis chegan tamén a Melide. Desde o Pazo de Congresos percorrerán a vila pasando pola Rúa Río Furelos, Ronda de Pontevedra, Rúa Alexandre Bóveda., Cantón de San Roque, Ronda da Coruña, Avda Toques e Friol e Taboada Roca.

A continuación o Centro Sociocultural Mingos de Pita acollerá unha recepción e un belen vivente.

A BAÑA

O Concello da Baña ten preparada unha gran festa para recibir as Súas Maxestades os Reis Magos de Oriente o vindeiro venres, 5 de xaneiro. O obxectivo é acompañar á cativada na espera da noite máis máxica do ano e gozar xuntos dunha tarde especial.

O pavillón de San Vicenzo acollerá unha gran festa a partir das 17.00 horas coa actuación da Compañía Sempre Arriba que presentará a peza Hoxe Sí! Trátase dun espectáculo en linguaxe clown con acrobacia aérea e, sobre todo, moito humor.

A comitiva real chegará ao pavillón municipal ás 18.00 horas para falar co público infantil, e cos maiores que así o desexen. Tamén haberá reparto de agasallos entre os nenos e as nenas.

Tras a recepción oficial, todas as persoas que así o desexen poderán desfrutar da saborosa rosca de Nadal e gozar cos inchables instalados no recinto neste día tan especial.

DODRO

O vindeiro día 5 de xaneiro as súas Maxestades os Reis Magos de Oriente visitaran Dodro para recoller as peticións dos cativos da comarca.

Serán recibidas a partir das cinco e media da tarde no pavillón de deportes municipal cunha gran festa con animación musical, chocolate con churros e moitas ilusións.

Share.

Comments are closed.

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies