Bisbarra, 13 de abril do 2023 – Nava Castro, en nome da Xunta de Galicia, participou no acto de adhesión de nove xardíns galegos na Rede Europea de Xardíns históricos.
Da bisbarra de Compostela incorpóranse o Pazo de Oca, a Alameda de Santiago e Pazo de Santa Cruz de Rivadulla. O de Rivadulla en Vedra abrirá ademais as súas portas dentro dos actos organizados pola Rede o vindeiro 26 de abril, Día Europeo dos Xardíns Históricos.
Segundo explicou Nava Castro, directora xeral de Turismo, xunto aos mencionados entran tamén a formar parte desta Rede, o Pazo de Mariñán, o Pazo de Rubiáns, o Pazo Quinteiro da Cruz, o Pazo de Lourizán, o Castelo de Soutomaior e o Pazo Museo de Quiñones de León.
Rede Europea de Xardíns históricos
A Rede Europea de Xardíns históricos é unha asociación sen ánimo de lucro, creada no ano 2016, da que forman parte 41 xardíns. O obxectivo é protexer e promover este tipo de espazos. No ano 2020 o Consello de Europa certificou a ruta como un dos seus itinerarios culturais.
Conta cun comité científico formado por 12 académicos, científicos ou profesionais especializados nos sectores da cultura e o turismo de cinco países diferentes. Estas persoas representan a súa vez a institucións de toda Europa, entre elas o CSIC español; o Icomos-IFLA, Unesco; a Alliance of World Heritage Cultural Landscapes ou o German Society for Garden Art and Landscape Culture entre outros moitos.
Día Europeo dos Xardíns Históricos
O vindeiro 26 de abril a Unión Europea celebra o Día Europeo dos Xardíns Históricos. Desde a Rede explican que o obxectivo e poñer en valor “este importante patrimonio verde que todos compartimos. Nesta ocasión destacamos os diferentes eslavóns que configuran as relacións entre todos os xardíns históricos como o artísticos e o botánico, todos nos conectan e explícanos”.
En este enlace tes o programa completo de actividades ao longo de todo o continente, do que formará parte o Pazo de Santa Cruz de Rivadulla en Vedra.
