Bisbarra, 5 de outubro do 2022 – O Tribunal Superior de Xustiza de Galicia, TSXG, ven de paralizar, de forma preventiva, a execución do parque eólico do Campelo, nos concellos de Coristanco e Santa Comba.
Hai un ano o Consello da Xunta de Galicia concedera a declaración de utilidade pública e autorizara a construción do parque do Campelo. O TSXG anula agora ese acordo e estima o recurso presentado pola Asociación para a Defensa Ecolóxica de Galicia, ADEGA, e a Plataforma para la Defensa de la Cordillera Cantábrica, PDCC.
O proxecto está promovido pola sociedade Greenalia Wind Power Campelo, S.L., en cuxo Consello de Administración se atopa na actualidade a que fora Conselleira de Medio Ambiente co PP, Beatriz Mato. A impugnación baseouse na fragmentación artificial dos proxectos e nas irregularidades na exposición pública que se reduciu a quince días e na que non se puxo a disposición toda a documentación.
O Auto indica que “non se pode ignorar que os defectos de publicación e audiencia que alega a letrada da actora xa teñen dado lugar á estimación de dous recursos nos que, con fundamento nas mesmas normas, se alegaba tal deficiencia”, referíndose a sendas Sentenzas de 21 de xaneiro de 2022, que declararon a nulidade das autorizacións relativas ao proxecto do parque eólico de Corme G-3 (modificación substancial por repotenciación), igualmente de competencia da Xunta de Galicia.
O Tribunal engade que nin Greenalia nin a Xunta, partes demandadas, conseguen avalar a “imperiosa necesidade de contar co novo parque, nin sequera pola incidencia que vén producindo a menor entrada de gas con ocasión da guerra en Ucraína, determina, que, en orde a valorar os intereses en conflito, teña que inclinarse esta sala por favorecer a protección de medio ambiente e, por tanto, ordear a suspensión cautelar…”.
As partes demandantes, ADEGA e PDCC, terán que depositar unha garantía de 10.000 euros. A promotora do proxecto pretendía que esa cifra fora unha porcentaxe do orzamento de execución (42.539.763,95 Euros) ou, no seu defecto, o importe xa investido no Campelo (11.930.834,71 Euros). A xustiza entendeu que “a fixación dun importe desproporcionado faría estéril a suspensión que aquí se decreta…”.
Xunto ao de Campelo, a demanda presentouse tamén contra as autorizacións outorgadas para os parques eólicos Bustelo e Monte Toural, igualmente promovidos por Greenalia. Os tres recursos foron interpostos á cargo do Fondo para a Defensa Xurídica da Cordilleira Cantábrica, campaña de recadación colectiva promovida o ano pasado por seis entidades (ADEGA, SGO, PDCC, a Mesa Eólica de Las Merindades de Burgos, Bierzo Aire Limpio e a Plataforma para la defensa de los Valles Pasiegos) para iniciar accións xurídicas na defensa do territorio fronte a invasión eólica.
Este Auto constitúe o primeiro éxito xurídico do Fondo para a Defensa Xurídica da Cordilleira Cantábrica fronte o actual modelo caótico e desordenado de desenvolvemento eólico, e un precedente moi favorable de cara á consecución da paralización cautelar doutros proxectos eólicos autorizados pola Xunta de Galiza e recorridos nos tribunais.
