Bisbarra, 31 de agosto do 2022 – A xeración de electricidade, sexa co método que sexa, implica o seu traslado afectando ao territorio, ao patrimonio e as persoas.
Non fai nin dous meses que contabamos a preocupación de veciños de Padrón pola liña que atravesaría a aldea do Areal. Agora vimos de coñecer que a Xunta de Galicia autorizou este mes o trazado.
Unha liña de alta tensión á que se opoñía, xa no mes de febreiro o Consello da Cultura Galega por afectar de forma directa ao Castro Lupario. O proxecto afecta tamén a Brión e Teo e foi publicado este martes no DOG. Ábrese prazo para un recurso de reposición e posteriormente podería chegarse a un contencioso administrativo.
Non é o único caso porque hai unha semana falabamos do proxecto de Villar Mir Energía dunha liña de cincuenta quilómetros desde Mazaricos a Compostela. Unha liña de alta tensión que afectaría a Negreira, A Baña e Ames ademais dos concellos de saída e chegada.
Ordes librouse no 2019 dunha liña que contaba tamén coa oposición veciñal e que esta previsto que fora de Gasalla ao Monte Inxerio. Agora, tres anos despois, a saturación de liñas de alta tensión é unha ameaza real.
O voceiro do BNG de Ordes, Pablo Vidal, ven de denunciar que o proxecto LAT Gato-Mesón suporía “a creación dunha nova subestación colectora que recolla a enerxía transportadas por tres novas liñas de alta tensión, denominadas Gato-Mesón, Campelo-Mesón e Gasalla-Mesón”. Para Vidal, “isto suporía poñer unha alfombra vermella a novas limitacións no aproveitamento de numerosas parcelas, nunha zona xa inzada de liñas debido á proximidade da Subestación Mesón do Vento”, e considera como única alternativa “o desdobramento ou a repotenciación das liñas de transporte de enerxía xa existentes, sen crear novas afeccións”.
A este panorama hai que engadir o paradoxo das continúas queixas por microcortes, ou non tan “micro”, no rural. A instalación de puntos de recarga para vehículos comeza a ser unha necesidade cada vez maior. O debate é necesario pero aínda máis urxente é definir as necesidades e planificar como se afrontan para que o patrimonio e a vida dos veciños se vexan o menos afectados posibles.