Bisbarra, 24 de outubro do 2022 – O PSdeG levou de novo ao Parlamento a LAT, liña de alta tensión, autorizada pola Xunta en agosto e que afectará ao Castro Lupario, á aldea de Angueira de Castro, o Pazo do Faramello, os núcleos de Faramello e Francos e varios petróglifos.
No proceso de alegacións o Consello da Cultura Galega emitira un informe contrario á instalación de este tendido. Esta documentación foi desestimada cun documento redactado por unha “persoa experta de orde internacional” da que nunca se chegou a coñecer a identidade e pola que os socialistas volverán a preguntar ao non atopar resposta en esta ocasión.
A parlamentaria Noa Díaz explicou na súa intervención na Comisión de Cultura que a LAT ocasionará un “dano irreparable” nunha zona de alta concentración de xacementos históricos. Na súa primeira quenda de intervención fixo fincapé na autoría de ese informe da Dirección Xeral de Patrimonio contrario ao emitido polo Consello da Cultura Galega.
O Secretario Xeral de Cultura, Anxo Lorenzo, foi o que acudiu a responder as preguntas da parlamentaria socialista e incidiu en que a impulsora da liña, Red Eléctrica Española, asegurou que as alternativas ao trazado da LAT son aínda máis nocivas e que, de todos xeitos, foron facéndose cambios durante o procedemento.
O Castro Lupario esta inmerso nun proceso para ser declarado BIC, Ben de Interese Cultural, desde hai moitos anos. Esta cuestión centrou unha parte do debate e na segunda quenda Noa Díaz recolleu a declaración de Anxo Lorenzo, que viña de asegurar que o Castro Lupario poderá ser declarado Ben de Interese Cultural pese a liña de alta tensión, para dicir que de ser declarado antes a liña non podería pasar por alí.
Ante as declaracións de Noa Díaz sobre a terrible incidencia da LAT na zona, Anxo Lorenzo quitou ferro ao asunto na súa resposta e lonxe de explicar a quen pertence o informe que quita valor á zona apelou a el para defender a autorización emitida para a liña de alta tensión.
A cuestión volverá ao Parlamento xa que o Partido Socialista pedirá o informe e coñecer a identidade de ese experto internacional. Por outra banda piden que se retire a autorización outorgada en agosto e que se busque unha solución de inmediato.
