Bisbarra, 25 de febreiro do 2025 – A Xunta de Galicia aprobou no Consello de este luns o proxecto de trazado da primeira fase de desdobramento da autovía Brión Noia.
Un tramo de case 10 quilómetros no que se investirán 29 millóns de euros. Esta primeira fase de conversión en autovía supón o 60 % da lonxitude de 18,2 km da VAP Brión-Noia, aproximadamente.
Cada calzada disporá de dous carrís de 3,5 metros, que darán continuidade ás características da vía no tramo Santiago-Brión, e realizaranse modificacións na conexión coa autovía Santiago-Noia para adaptar o trazado existente á nova autovía.
Unha parte dos traballos complementarios xa están realizados. En eles incluíronse a maior parte das obras de paso, ou a plataforma final con sección de autovía, ademais das estruturas dun paso inferior no punto 11+945 e do viaduto de Naveira.
A aprobación definitiva deste proxecto por parte do Executivo autonómico comporta tamén a declaración de utilidade pública, pola que se dispón a urxente ocupación dos terreos necesarios para executar esta intervención.
O proxecto ten por obxectivo converter en autovía o treito comprendido entre os quilómetros 11+640 e 21+300, realizándose o desdobramento para a autovía cara ao lado esquerdo da vía de altas prestacións CG-1.5, polo que se manterá a estrutura actual ao situarse no lado contrario do carril lento.
Deste xeito favorécese que se poida manter a funcionalidade durante o transcurso das obras. A estrada proxectada polo Departamento de Infraestruturas da Xunta no desdobramento será para cada calzada de dous carrís de 3,5 metros, beiravías de 2,5 metros exterior e 1 metro interior, e disporá de mediana de 3 metros entre bordos de beiravía das plataformas contiguas, dándolles continuidade ás características da autovía no tramo Santiago Brión.
No marco das obras que se acometerán realizaranse algunhas modificacións na conexión coa autovía Santiago-Noia (AG-56), co obxecto de adaptar o trazado existente á nova autovía. Unha das modificación consistirá na reconstrución dos noiros do desmonte na marxe esquerda en dirección Noia, para obter o ancho necesario para a nova sección.
Actualmente o treito obxecto do proxecto de trazado da VAP Brión-Noia conta con dous enlaces a distinto nivel, Urdilde e Martelo, e cun ramal de incorporación a nivel en Gundín, sentido Santiago.
Os dous enlaces conservaranse, sendo obxecto do desdobramento a execución definitiva dos ramais da calzada para desdobrar, pero o ramal de Gundín desaparecerá coa ampliación da calzada pola imposibilidade física de conservalo co desdobramento da vía.
Os enlaces deste novo treito de autovía estarán en Urdilde, no punto quilométrico 15+400, a 3,4 quilómetros do anterior enlace en Brión, e en Martelo, no punto quilométrico 18+930, a 3,53 quilómetros do anterior enlace. No caso do viaduto de Naveira, proponse unha ponte xemelga á existente, coa peculiaridade de que os pilotes de 1 metro de diámetro dos estribos xa están executados. O viaduto terá 7 vans de 40 metros de luz entre eixes de pilas. Estas serán fustes octogonais ocos. O taboleiro terá unha anchura de 11,50 metros.
