Asinan un convenio no que promoverán o emprendemento en 32 concellos da comarca. A iniciativa da Deputación e a Cámara de Comercio contempla asesoramento, formación e captura de financiamento.
Cámara de Comercio e Deputación asinan unha alianza encamiñada á procura e apoio en 32 concellos da comarca. UN proxecto que nace baixo o nome de “Fomento do emprendemento e a actividade empresarial da provincia”.
O documento foi asinado na sede do organismo provincial polo presidente da Deputación, Valentín González, e a presidenta da Cámara de Comercio, María Pais. Un acordo que se nutrirá do financiamento do Plan de Emprego Local, PEL, Da Deputación.
A iniciativa supón un investimento de 69.375 euros, dos que a Deputación achegará o 80% (55.500 euros) e pretende apoiar a posta en marcha de novos negocios na comarca de Santiago para crear emprego de calidade, xerar riqueza e lograr un maior desenvolvemento socioeconómico.
O obxectivo principal é contribuír á creación e consolidación de empresas, fomentar o autoemprego e proporcionar axuda para que mozos e mozas, sobre todo do rural, poidan desenvolverse na súa terra.
Valentín González explicou os tres eixes nos que se asenta o plan “Esta alianza coa Cámara de Comercio de Santiago supón un paso máis na aposta da Deputación pola creación de emprego e o apoio ao empredemento, que se desenvolverá en tres ámbitos: o primeiro accións dirixidas aos centros de ensino secundario, bacharelato e formación profesional para que a mocidade vexa o emprendemento como unha vía con posibilidades para o seu futuro; o segundo vai dirixido ás persoas emprendedoras, ás que se lle ofrecerá asesoramento nos seus proxectos para que se consoliden e expandan do mellor xeito posible; e o terceiro e último consistirá nun servizo de apoio para que esas pequenas empresas logren acceder a diversas liñas de financiamento”.
A presidenta da Cámara, María Pais, destacou o compromiso da Cámara “co fortalecemento do tecido empresarial e a promoción do crecemento empresarial e o emprego da demarcación cameral, traballando en estreita colaboración cos axentes clave do territorio, como é a Deputación, polo que agradeceu o compromiso compartido para lograr un desenvolvemento socioeconómico sostible e equitativo”
Este proxecto ten un marcado carácter supramunicipal pois o seu ámbito de actuación esténdese a 32 concellos (A Baña, Ames, Arzúa, Boimorto, Boiro, Boqueixón, Brión, Carnota, Dodro, Lousame, Mazaricos, Melide, Muros, Negreira, Noia, O Pino, Outes, Padrón, Porto do Son, A Pobra do Caramiñal, Rianxo, Ribeira, Rois, Santa Comba, Santiago de Compostela, Santiso, Sobrado, Teo, Touro, Toques, Vedra e Vilasantar).
Por último, tanto a Deputación como a Cámara de Comercio insisten en que a importancia de accións coma esta radica na capacidade de crear e consolidar empresas como unha das formas máis eficaces de loitar contra o desemprego.
