Compostela e bisbarra, 9 de xuño do 2023 – Hoxe venres hai previstas reunións en distintos concellos de cara a formar gobernos ou acordos de mandato de cara ao día despois da toma de posesión dos alcaldes.
En xeral as conversas son cordiais aínda que hai concellos nos que nin se producen nin se esperan, como é o caso de Brión no que o Psoe terá un goberno en minoría ao ser a lista máis votada.
Compostela
O mércores o BNG reuníase con Compostela Aberta xa coa entrada no goberno enriba da mesa. Avances significativos que non se concretan nas declaracións pero que camiñan cara a unha integración antes do 17.
Onte xoves foi a quenda do Psoe. O posicionamento é o mesmo, unha vez garantida a investidura as conversas avanzan sobre temas concretos da cidade. En este caso os socialistas piden serenidade e explican que as decisións que tomen serán polo ben da cidade.
Mentres todo isto sucede o Partido Popular reunía a súa executiva e Borja Verea insistía no feito de que a cidade “non votou un goberno de seis concelleiros”. Verea engadiu que “son coñecedor de que a Lei permite esta situación tan surrealista pero o sentido común non; e estou convencido de que esta falta de seriedade e responsabilidade terá as súas consecuencias”.
Padrón
En Padrón está garantida a toma de posesión do socialista Anxo Arca como novo alcalde co apoio da concelleira do BNG Beatriz Rei. A nota de prensa emitida para confirmar o acordo de investidura era única, cos logotipos dos partidos, o que da idea da boa sintonía.
Hoxe venres continúan as conversas. Anxo Arca avanzou que era partidario de gobernar en minoría con acordos puntuais pero non pecha ningunha porta polo que todas as opcións están sobre a mesa.
Ames
En Ames ambos equipos negociadores, BNG e Psoe, parecen apostar por un goberno estable. Nas conversas non participan os candidatos Blas García e David Santomil. Todo apunta a un goberno similar en número de concelleiros ao actual, 13, pero no que os nacionalistas pasarían de ter tres concellerías a contar con cinco.
A Baña é outro concello no que tanto Psoe como BNG mostraron a súa boa disposición a que goberne a esquerda. Dase a circunstancia de que a número un do BNG era a número dous do Psoe cando se produciu a moción de censura que rematou co goberno socialista. Esta circunstancia convida a pensar que as diferenzas son máis de matices e que non debería existir grandes problemas para chegar a un acordo.
Os dous partido interpretan os resultados como unha aceptación dos veciños de que o traballo realizado ata a moción de censura foi bo. O Psoe quedouse de feito a 19 votos do Partido Popular.
Negreira
As conversas en Negreira retoman tamén hoxe venres. Non haberá dificultade para que Manuel Ángel Leis sexa elixido de novo alcalde e quedará por decidir si o BNg intégrase no equipo de goberno ou prefire quedar fora e dar apoios puntuais.
