Bisbarra, 10 de outubro do 2024 – As regueifas son algo noso que durante anos estivo perdido entre a falta de coidado do patrimonio inmaterial e a necesidade de recuperación. O certame “Enreguéifate” chega a súa oitava edición demostrando o seu magnetismo.
O lema de esta edición “Puro magnetismo” é claro: “Enreguéifate” atrae a todo o mundo, moitos dos nosos mellores rapeiros comezaron así a súa carreira e os máis novos o están a facer tamén.
Os máis vellos ven recuperarse unha tradición vinculada non só á música, tamén á retranca, a competencia entre aldeas, a un xeito de ser galego que se entende sobre todo sendo galego; unha redundancia necesaria.
O “Enreguéifate” está impulsado desde o principio polos concellos de Ames, Carballo, Pontevedra, Santiago de Compostela e Teo. Na rolda de prensa todos coincidiron en votar de menos a participación da Xunta de Galicia nun certame tan galego.
O programa de actividades da oitava edición inclúe accións formativas para escolares e profesorado e un certame regueifeiro aberto á improvisación oral de toda a cidadanía.
O “Enreguéifate” reivindica o valor da improvisación oral en verso, a regueifa, como unha das expresións máis representativas da poesía popular oral galega e como unha vía para fomentar o uso da lingua galega, especialmente entre a mocidade.
A alcaldesa compostelá, Goretti Sanmartín; o rexedor de Ames, José Blas García Piñeiro; o concelleiro de Normalización Lingüística de Pontevedra, Demetrio Gómez Xunqueira; a concelleira de Lingua de Teo, María Vázquez Rey; e Lupe Blanco, regueifeira e formadora do Enreguéifate, quen deu comezo ao acto regueifando, deron a coñecer todos os detalles desta nova edición. Á presentación asistiron, ademais, responsables de normalización lingüística dos concellos impulsores.
“Enreguéifate, puro magnetismo!” é o lema desta oitava edición que dará comezo cun obradoiro de formación para profesorado. Terá lugar o venres, 18 de outubro, nas Escolas do Xardín Agra de Caldas de Carballo, da man de Manolo Maseda, Séchu Sende, Lupe Blanco e Josinho da Teixeira. Unha actividade gratuíta para a que está aberta a inscrición até o 15 de outubro a través da web do “Enreguéifate”.
Prazo e categorías do certame regueifeiro
Con esta oitava edición do “Enreguéifate” volve tamén unha das súas citas imprescindibles, o certame de regueifas en vídeo. O prazo para participar estará aberto entre o 20 de xaneiro e o 20 de marzo de 2025. A inscrición poderá realizarse desde a páxina web do Enreguéifate, onde están xa dispoñibles as bases completas do certame.
As persoas interesadas en participar deberán enviar un vídeo no que aparezan, como mínimo, dúas persoas regueifando en galego e cunha duración máxima de 3 minutos. Este ano amplíanse de seis a oito os premios por cada unha das categorías, a xeral, aberta a calquera persoa; e a escolar, para alumnado dos centros educativos galegos non universitarios.
Así, amais dos xa tradicionais regueipremios para a regueifa máis brava, máis aguda, máis diversa, máis reivindicativa, mellor cantada e mellor falada, este ano tamén haberá galardóns para a regueifa máis inclusiva e a máis entroideira.
Os galardóns entregaranse nunha gala que este ano volverá ser un fin de festa conxunto dos proxectos Enreguéifate e Regueifesta.
