Bisbarra, 10 de outubro do 2024 – A borrasca Kirk deixou pegada na bisbarra e en Compostela. Só na capital tiveron que atender máis de cen incidencias e algunhas están aínda sendo reparadas.
Kirk pegou forte na comarca do Sar na que algunhas aldeas de Rois e Padrón foron anegadas e a auga chegou a entrar en algunhas casas. Outras zonas cercanas como Dodro, pese á gran cantidade de auga caída e o desbordamento de regatos, aguantaron moito mellor.
Os principais efectos do temporal tiveron que ver coa caída de árbores en tódolos concellos. Caídas que ademais do perigo implícito que supoñen, danando edificios e vehículos particulares, obrigaron a cortar varias estradas.
Os ríos tamén foron os que notaron máis a Kirk xa que o nivel de auga que levaban creceu ata desbordarse en moitos casos. Na zona de Negreira podíase ver o encoro do Tambre (nas imaxes) botando fora milleiros de litros de auga. Na Ponte Maceira o río tamén baixaba cheo e a ponte aguantaba a duras penas.
As queixas en algúns concellos, como Dodro, producíronse porque o 112 recollía, pese a que recollía as demandas de axuda, non era capaz de asignar recursos. Tiveron que ser na maioría dos casos os empregados municipais os que resolveran os problemas e mesmo, como sucedeu en Dodro, as brigadas contra incendios acudiron no seu día libre a votar unha man.
En Teo as emerxencias foron coordinadas pola policía local e contou con persoal de obras, parques e xardíns e augas de Teo ademais de protección civil. Desde o concello onte pola tarde levaban atendidas arredor de 80 incidencias. Na maioría dos casos caídas de árbores; en algún casos, como sucedeu en Ameneiro, caeron sobre vehículos particulares por sorte sen danos persoais.
Tamén caeu un poste de formigón de telefonía en Cantoña, tendo que cortarse esa estrada e quedando varias luminarias afectadas. O forte vento ademais arrancou un par de marquesiñas en Regoufe.
Compostela foi das cidades máis afectadas de Galicia. Entre as dúas da madrugada e as once da mañá os bombeiros tiveron 53 saídas. Caídas de árbores con cortes de estradas, teitos levantados como o do conservatorio, espazos anegados… As incidencias foron constantes en toda a cidade.
Kirk deixa un mal recordo en toda a comarca pero sobre todo deixa a sensación de que o inverno que está por chegar pode ser moi duro, pensando ademais que o outono acaba aínda de comezar.
