Bisbarra, 5 de xuño do 2023 – Altamira Brilla volve a Brión e Ames o vindeiro 10 de xuño coa colaboración dos concellos e da Deputación da Coruña.
Unha festa que lembra e recrea os acontecementos históricos relacionados coas Torres e coa batalla de Altamira. As Torres, situadas en Brión, son un monumento patrimonio da Deputación, considerado Ben de Interese Cultural e miradoiro privilexiado sobre o Val da Maía.
As Torres de Altamira foron construídas no século IX, derrubadas no século XIV e construídas de novo en 1471. Altamira Brilla pretende servir de punto de encontro para poñer en valor o monumento e recuperar a memoria histórica.
Programación
O programa da xornada comezará cunha ruta teatralizada polos escenarios da batalla, realizada polos grupos Títeres Alacrán e Os Quinquilláns. O evento contará ademais coa actuación musical de Fillas de Cassandra. Para participar na andaina é preciso escribir ao enderezo electrónico rutabatallaaltamira@gmail.com. Para as recreacións teatrais e o concerto a entrada é de balde, previa reserva a través desta ligazón.
A ruta pasará polos escenarios da batalla. Lugares como Augapesada, Ponte Maceira, Burgueiros, Trasmonte, Carballo, O Portanxil, Leboráns ata chegar a As Torres. Haberá servizo de autobús, con saída dende dous puntos: a carballeira de Santa Minia (Brión), ás 9:30 horas; e o Pazo da Peregrina (Bertamiráns), ás 9:45 horas. Dende Trasmonte ata As Torres farase unha andaina a pé. Ao remate, os participantes regresarán en autocar ata os lugares de saída.
Durante a tarde, terán lugar tres espectáculos. Ás 18:30 horas, Títeres Alacrán representará “Barrigaverde defendendo as Torres de Altamira”, unha obra pensada para o público familiar.
Poñeranse a disposición dos asistentes dous autobuses lanzadeira para acudir á representación artística e ao concerto programado. Os autocares comezarán a saír dende a carballeira de Santa Minia dirección ás Torres de Altamira a partir das 20:00 horas, e non retornarán ata rematar o último espectáculo da xornada.
A recreación teatral, “A batalla de Altamira”, correrá a cargo da compañía Os Quinquilláns, e terá lugar ás 20:30 horas. Finalmente, pechará o programa o dúo Fillas de Cassandra. Procedente de Vigo, é un dos proxectos da nova música emerxente máis prometedor do panorama galego. O seu primeiro traballo, Acrópole (2023) acaba de ser presentado e colleita xa numerosas críticas positivas. A súa é unha aposta pola recuperación das melodías tradicionais e a creación de novas líricas, inspiradas no canto de tradición oral pero tamén influenciadas polo pop, a electrónica e a música clásica.
