Compostela acolle o 21º Congreso Ibérico Da Bicicleta. Santiago recibe grandes expertos estatais e internacionais en mobilidade arredor e con bicicletas.
O 21º Congreso Ibérico da Bicicleta e a Cidade comeza este vindeiro xoves en Compostela. Catro plenarios, máis de 85 ponencias, talleres prácticos e visitas técnicas conforman o programa do evento, que se celebrará no Auditorio de Galicia e na Facultade de Filoloxía.
Bicicletas
O concelleiro de Mobilidade, Xan Duro, presentou o programa organizado por Conbici, a coordinadora en defensa da bici, e pola Federación Portuguesa de Cicloturismo e Usuarios da Bicicleta, co apoio de Composcleta.
O presidente desta asociación, Faustino Gómez, tamén participou na rolda de prensa, xunto con Pablo Amenedo, subdirector xeral de Ordenación do Transporte, e Carmen Pita, directora de Promoción de Turismo de Galicia.
Duro destacou que a celebración deste Congreso en Santiago “é un orgullo para o Concello, pero tamén unha oportunidade para aprender da experiencia doutras cidades e dos coñecementos de grandes expertos”. O concelleiro reiterou a aposta que fai o Goberno local pola mobilidade ciclista “como chave para termos unha cidade máis sostible e máis acolledora para as persoas”.
Tanto o subdirector xeral de Ordenación do Transporte como a directora de Promoción de Turismo de Galicia destacaron o apoio da Xunta a este Congreso, dentro da súa vontade de fomentar o uso da bicicleta, tanto como medio de transporte sostible como no que tén que ver co cicloturismo e o ecoturismo.
Catro plenarios con figuras internacionais
Xan Duro presentou os catro grandes plenarios “nos que participarán persoas que son referenciais no ámbito da mobilidade ciclista en todo o mundo”. O primeiro deles, baixo o título “Pedaleando cara a empatía: reimaxinando espazos máis inclusivos nas nosas cidades”, correrá a cargo de Melissa Bruntlett, autora canadiense afincada nos Países Baixos que é unha das voces máis inspiradoras do ciclismo urbano internacional, e autora de libros clave para entender a mobilidade con perspectiva humana e de xénero.
O segundo plenario estará centrado na Política integral ciclista no desenvolvemento interurbano, e contará coa participación, entre outras expertas, da directora de Transición Ecolóxica da Deputación Foral de Guipuzkoa, Mónica Pedreira Lanchas.
“As bicicletas sí son para Galicia” é o título do terceiro dos plenarios do Congreso, a cargo de Iria Vázquez de Catro Ventos Editora; e por último, no último dos catro grandes plenarios, falarase de exemplos de boas prácticas internacionais, con Henrik Lundorff Kristensen, que exporá a experiencia de Copenhague; e Marie Joly, que falará da experiencia francesa.
O presidente de Composcleta, tamén destacou a programación complementaria ao propio Congreso, cunha reunión da Rede Europea Clean Cities, e cunha xornada de formación ciclista que se celebrará o 25 de xuño.
Faustino Gómez explicou que a día de hoxe xa hai máis de 200 persoas inscritas no Congreso, “que será unha oportunidade para facer un cambio modal en Santiago, aprendendo das estratexias e das realidades doutros lugares do mundo”.
Todo o programa do congreso así como o formulario para realizar a inscrición pode atoparse na web https://congresoiberico.conbici.org/
