A Baña. 25/02/26 – A vivenda colouse nos titulares nacionais pero no rural o problema tamén existe desde hai tempo e os concellos traballan para palialo. Na Baña o goberno municipal deseñou unha estratexia que busca que a vivenda sexa un eixo prioritario de fixación de poboación e dinamización do municipio.
Un proxecto que comeza coa activación dun servizo municipal específico de asesoramento en materia de vivenda. O obxectivo é facilitar á veciñanza o acceso ás axudas públicas para a rehabilitación de inmobles e a mellora da eficiencia enerxética.
O alcalde da Baña, José Antonio Pereira, explicou que a iniciativa responde á vontade de “que ningún veciño quede sen axuda para mellorar a súa casa e que o Concello recupere patrimonio para atraer novos residentes”.
Apoio técnico para tramitar axudas
A través do Departamento de Emprego e Desenvolvemento Local, o Concello ofrece asesoramento técnico individualizado.
Traballase con dúas liñas clave da Xunta de Galicia. A primeira o programa VI435E, destinado á rehabilitación de infravivendas, co fin de garantir fogares dignos e seguros ás persoas con menos recursos.
Ao mesmo tempo asesorase sobre o Programa MT402A, centrado na corrección de impactos paisaxísticos e na mellora da eficiencia enerxética, contribuíndo á redución do consumo eléctrico e á sustentabilidade das vivendas.
Pereira destacou que “Non imos permitir que a complexidade administrativa frea oportunidades para a nosa xente. Este Goberno local está ao carón da veciñanza, acompañándoa en cada trámite para garantir que as axudas se transformen en melloras reais nas vivendas da Baña”.
A iniciativa da Baña forma parte dun plan máis ambicioso que busca revitalizar o municipio, atraer novos residentes e converter a política de vivenda nun instrumento eficaz para encher de vida o concello.
Esta acción complétase coa solicitude presentada polo Concello ao abeiro do programa VI422F, que permitiría rehabilitar edificios municipais en desuso cun financiamento de ata o 95% para convertelos en vivendas.
“Cada vivenda que rehabilitamos é unha oportunidade real para favorecer o asentamento de novas familias”, subliñou o alcalde, quen incidiu en que este esforzo permite garantir a viabilidade económica do municipio, dinamizar a vida social e reforzar a prestación de servizos públicos.
O obxectivo final é transformar inmobles municipais actualmente en desuso en fogares que xeren actividade, atraian poboación e contribúan a frear o envellecemento demográfico.
Con esta liña de actuación, o Concello da Baña reafirma a súa aposta decidida pola rehabilitación e polo impulso demográfico como piares dun modelo de xestión rural moderno, sostible e orientado ao futuro.
