Máis de 200 Axentes Ambientais participaron nunha asemblea en Santiago e non descartan adoptar medidas de presión
A Asociación Profesional de Axentes Forestais e Medioambientais de Galicia (APRAFOGA) reuniuse en Santiago para protestar pola falta de compromiso da Xunta de Galicia cos acordos alcanzados cos sindicatos que os representan.
Os Axentes ambientais destacan os incumprimentos na redacción do regulamento de funcións da nova escala de Axentes Téccnicos en Xestión Ambiental, un compromiso reflectido en acordos asinados no 2016 e 2019 e que segue sen implementarse.
Outra das demandas e que os traballadores pasen ao grupo B xa que consideran que é o que lles corresponde acorde as súas funcións. A Xunta de Galicia comprometeuse a que, no momento en que o colectivo chegara ao 40% de Axentes coa titulación do ciclo superior e que da acceso a dito grupo (cifra superada hai anos), se convocaría un proceso para pasar ao grupo B.
Tamén piden a revisión do acordo de condicións de traballo xa que se seguen incumprindo varios puntos e nunca se volveu a poñer en marcha a comisión de seguimento
Aumento de prazas. Os e as Axentes Ambientais teñen moitas máis competencias e cargas de traballo, pero to mesmo persoal que fai 40 anos cando se transferiron as competencias á Xunta.
A Asociación Profesional de Axentes Forestais e Medioambientais de Galicia e os sindicatos critican duramente a actitude da Consellería de Medio Rural, pola falta de previsión e planificación, xa que se están a realizar chamamentos para cubrir prazas en plena época de alto risco, algo que xa tería que estar feito con antelación.
Unidade de Directores de Extinción
Os axentes ambientais denuncian que un día antes da asemblea foron chamados desde a Consellería cunha proposta que cualifican de “ridicula” e coa intención de crear unha RPT só con Directores de Extinción o que significa que “nace morta”.
Os Axentes Ambientais demandan que se dote a esta unidade cun mínimo de 40 efectivos, con 10 prazas de nova creación por provincia, para, deste xeito, poder cubrir todas as quendas de traballo necesarias e garantir deste xeito que o descanso das persoas non deixe eivas na efectividade e calidade do seu traballo. Tamén lembran que trala vaga de lumes do 2017, houbo un compromiso parlamentario de creación de 57 novas prazas de Axentes que nunca se chegou a cumprir.
Medidas de presión
Como medidas a tomar, dende APRAFOGA e as organizacións sindicais non se descarta iniciar medidas de presión valorando futuras manifestacións ou outras medidas a valorar. Neste sentido, esperan non ter que acudir a convocatoria de folga como se realizou en anos pasados. Como paso previo a estas medidas, e sempre con intención de diálogo, os Axentes Ambientais van solicitar reunións coa conselleira do Medio Rural, a conselleira de Medio Ambiente e o conselleiro de Facenda para tentar solucionar estes incumprimentos por parte da Administración.
