Compostela, 11/03/2026 . Compostela está chea de historias por contar e o sucedido en marzo de 1968 é unha delas. Un par de meses antes do famoso maio do 68 francés, en Compostela os estudantes xa pedían democracia na universidade.
“Antes de maio” é unha novela visual impulsada desde o Concello de Santiago que se complementa co paseo guiado “Venceremos nós” que discorre polos lugares nos que sucederon aqueles feitos.
A concelleira de Memoria Histórica, Míriam Louzao, presentou estas dúas iniciativas que recuperan a historia das protestas estudantís do 68 na cidade baixo o selo “Compostela é memoria”.
Louzao sinalou que Santiago tivo un papel relevante na chamada primavera do 68, que chegou en marzo, adiantándose ao maio francés. Para lembralo, o Teatro Principal acollerá a presentación de “Antes de maio”, un pioneiro proxecto que combina ficción e documental recreando estes feitos.
Por outra banda o paseo “Venceremos nós” percorrerá as rúas da cidade para mergullarnos no contexto da época. As dúas propostas son de balde, a primeira con entrada libre no Teatro Principal o martes 17 de marzo ás 20.30 horas e segunda con inscrición previa en marzo68.gal.
A concelleira recordou que no curso 67-68 dous eventos anticiparon en Compostela o famoso maio francés, mesmo baixo a ditadura franquista. Máis de mil estudantes protagonizaron un feche pacífico no edificio central da Universidade de Santiago de Compostela, hoxe a Facultade de Xeografía e Historia, desaloxado ao terceiro día pola Policía Armada. A finais de mes, unha asemblea en Medicina foi tamén desaloxada violentamente polos grises, con detidos e feridos.
“Estes son os dous feitos máis sonados dunhas protestas que estenderon unha folga estudantil durante case dous meses, reivindicando a democratización da universidade. Mais por baixo, a mocidade estaba a botarlle un pulso ao Franquismo, loitando por un cambio de réxime e a chegada da democracia. A pesar do avanzado na primavera do 68, é pouca a xente que coñece hoxe estes feitos e a súa relevancia”, reflexionou Louzao.
“Antes de maio”
O audiovisual “Antes de maio” é un proxecto de Aqueladas, mestura de ficción e documental, que recibiu o Premio a Proxectos Culturais Singulares para a Mellora Social da Deputación da Coruña.
Co formato dunha novela visual -un tipo de experiencia interactiva próxima a un videoxogo narrativo sinxelo, que combina textos, deseños artísticos e toma de decisións, sitúa ao público na pel dunha estudante de primeiro no curso 67-68, que terá que escoller como implicarse nas protestas estudantís.
As persoas participantes irán facendo distintas eleccións, algunhas máis banais e outras máis transcendentais, que condicionarán o desenvolvemento do relato e a forma de vivir os acontecementos.
A narración incorpora fragmentos de entrevistas realizadas durante o proceso de documentación, que funcionan como contrapunto e achegan testemuños reais. Nelas participan Camiño Noia, Carme Ríos, Manuela Corral, Elena López, Carlos Campoy e as irmás Susana e Marisol López Facal.
A listaxe é eminentemente feminina, pois Antes de maio ofrece unha visión centrada na perspectiva das mulleres da época, que busca os pequenos detalles cotiás máis alá do feito histórico.
A medida que avanza a historia, a protagonista irá reunindo un inventario con diferentes materiais (libros, propaganda, etc), que o público poderá consultar a través dos seus teléfonos móbiles. O proxecto conta con ilustracións de Álex Rozados e Iria Iglesias, e guión de Irene Pin.
Esta singular proposta terá unha proxección interactiva o vindeiro martes 17 de marzo, ás 20h30 no Teatro Principal, con entrada libre ata completar aforo. O público deberá votar en tempo real co móbil, decidindo en común o devir do relato. Ademais, a iniciativa percorrerá varios centros de ensino da cidade, para achegar ao alumnado este episodio histórico.
“Venceremos nós”
O paseo guiado “Venceremos nós”, xurdido ao abeiro deste audiovisual, completa a aposta do Concello por recuperar e divulgar a memoria do 68 en Compostela. O percorrido polas rúas da cidade trasládanos ás mobilizacións estudantís e sociais antifranquistas, que se adiantaron ás coñecidas revoltas do maio francés.
Levaranse a cabo catro sesións guiadas do paseo nesta semana. Serán o xoves 12 ás 19 h, o venres 13 ás 19 h e o sábado 14 de marzo ás 12 h e ás 16.30 h. Hai prazas limitadas e requírese inscrición previa a través da web marzo68.gal.
Porén, existirá ademais unha versión dixital autoguiada que poderá facerse a través da mesma web, con versión en galego e en inglés, onde se recollen con texto e audio as diferentes paradas deste percorrido. A páxina xa está en aberto e a súa versión en inglés estará dispoñible a finais de marzo.
