Compostela, 6 de febreiro do 2024 – A Fundación Neira Vilas e o Ateneo de Santiago presentan esta tarde unha nova adaptación gráfica de “Memorias dun neno labrego” realizada por Iria Aldegunde.
Xosé Neira Vilas escribiu a principios dos anos 60 “Memorias dun neno labrego”, unha obra que remataría por converterse nun dos clásicos da literatura galega. A presentación de esta adaptación terá lugar ás 19.30h na sede Afundación da compostelá, na Rúa do Vilar, 19.
Sendo unha das obras da literatura galega máis traducidas, “Memorias dun neno labrego” narra a vida de Balbino, un rapaz de aldea pertencente a unha familia moi pobre, que plasma as súas aventuras a través dun caderno. O libro é unha crítica social ao que viviron os labregos da época nunha Galicia marcada polas emigracións, o atraso e o rexeitamento por parte dos casteláns.
Iria Aldegunde pon en imaxes ese mundo que Balbino contempla ao seu redor cos ollos moi abertos e que tenta entender, pois, como el afirma, vimos ao mundo cunha alforxa de preguntas.
Iria Aldegunde (Santiago de Compostela, 2000) graduouse en Filoloxía Inglesa pola USC, estudos que foron complementados cunha formación en banda deseñada na escola profesional O Garaxe Hermético. Ademais, participou na elaboración dos libros colectivos Florencio (2022) e Gaspariño XXI (2023).
