O folclore tradicional vive un dos seus mellores momentos, pola cantidade de grupos que aparecen e tamén polo uso que se fai das melodías e estilos máis clásicos, fusionándoas con outras músicas. Un momento no que interese dos cativos pola nosa música é cada vez maior, algo que se debe aproveitar e apoiar.
En esta liña a Asociación Cultural Os Castros de Ames organiza un curso de iniciación á música tradicional dirixido a nenos e nenas de entre 4 e 12 anos de idade. Baixo o lema “O folclore precisa canteira! O futuro son @s nen@s” a asociación impartirá obradoiros de baile, pandeireta e canto todos os xoves dende xaneiro, de 18.30 a 20.30 horas, na Casa da Cultura de Bertamiráns.
Os interesados no curso recibirán a formación básica en baile tradicional, a pandeireta e, como novidade neste ano, o canto. O obxectivo é manter vivo o gusto pola música e o baile tradicionais entre os nenos e nenas de todo o Concello de Ames. O curso será continuado, sen peche de inscrición para poder participar a calquera altura do ano. O prezo de inscrición do curso é de 10€.
Ante calquera dúbida, as persoas interesadas poden obter máis información no blog da asociación blog.acoscastros.es, no enderezo de correo electrónico correo@oscastros.es ou no número de teléfono 690 96 23 63. Tamén é posible estar informado na conta de Instagram de Os Castros @a.c.oscastros e na de Facebook Asociación Cultural Os Castros.
A asociación Os Castros
Este curso enmárcase dentro da programación cultural deste ano 2026 da Asociación Cultural os Castros, que leva en activo dende principios da década dos anos 90 fomentando o folclore galego entre todas as idades mediante os continuos cursos formativos tanto en baile como en música.
Neste curso 2025-2026, ademais do curso de iniciación para nenos e nenas, a asociación tamén vén ofertando clases de baile, música, gaita e percusión para todas as idades e en diferentes horarios.
