Compostela, 27 de xullo do 2018 – Despois de que o pleno de Compostela aprobara as modificacións as ordenanzas de terrazas e ruído a Asociación de Hostalería convoca unha nova asemblea para decidir que accións tomar.
A asemblea celebrarase o próximo martes día 31 e o principal debate será, case con total seguridade, o cambio referido ao espazo a ocupar polas terrazas. As modificacións limitan o uso, nas novas terrazas, a fachada do local sen poder ocupar espazos colindantes como sucedía ata o de agora.
Esta é a segunda Asemblea que organiza a Asociación desde que o Concello anunciase a modificación da Ordenanza. Na primeira reunión, celebrada o 16 de xullo, os hostaleiros amosaron a súa preocupación polos cambios introducidos. O 19 de xullo celebrouse o Pleno onde se aprobou o texto – só co voto favorable de Compostela Aberta, a abstención do BNG e PSOE e o voto en contra do PP – abríndose entón un período para presentar alegacións.
O encontro do próximo martes 31 enmárcase, según a Asociación, dentro do obxectivo xeral da Xunta Directiva de fomentar o diálogo e a unión do sector en Compostela, escoitando as súas demandas e servindo de ponte coas distintas administracións para a defensa dos seus dereitos.