Padrón, 26/06/2026 – O incendio de Herbón, en Padrón, foi a saída dun verán que se presenta complicado, no que parecen repetirse erros e que chega con moitos deberes sen terminar. A xornada de reflexión “As pegadas do lume” convócase por estes motivos para o vindeiro día dous de xullo no local social de Carcacía, a cita ás sete e media da tarde.
O pasado 13 de xuño, un incendio forestal que comezou na parroquia de Herbón, aínda por causas descoñecidas, acabou calcinando máis de 350 hectáreas no Concello de Padrón. O monte Meda, unha superficie das comunidades de montes de Herbón e Carcacía, foi arrasada polas chamas, chegando a poñer en risco aos núcleos de Sobrerribas e Cruxeiras de Abaixo.
E despois do lume que?
Máis aló do balance de danos materiais e ambientais, os incendios deixan tamén unha pegada nas persoas que os viven. Porén, non é habitual contar cun espazo onde a veciñanza poida compartir as súas vivencias, reconstruír o que ocorreu e pensar que podemos facer fronte aos incendios.
Isto é o que se pretende co Encontro “As Pegadas do Lume”, unha iniciativa do Proxecto Batefogo que convida á veciñanza de Padrón, e nomeadamente ás veciñas e veciños das zonas afectadas, a falar sobre o acontecido e pensar no que virá.
Porque cada persoa garda unha parte da historia, a túa tamén é importante.
A participación é libre e non require coñecementos técnicos nin pertenza a ningunha entidade. O encontro enmárcase no Proxecto Batefogo, unha iniciativa orientada á prevención social dos incendios forestais e ao fortalecemento da implicación comunitaria no coidado do territorio. O proxecto conta co financiamento da Deputación da Coruña e coa colaboración das entidades locais participantes.
