O PP e o PSdeG de Compostela e o PP de Ames reclaman en ambos os dous concellos arranxos en instalacións e estradas dos municipios
O papel das oposicións é fiscalizar o traballo dos gobernos municipais, vixiar que o que fan sexa o que compre facer. Pero ademais as oposicións tamén teñen que poñer sobre a mesa o que non se fai aínda que aquí as razóns poden ser variadas, desde falta de orzamento ata retrasos nas tramitacións sen esquecer a posibilidade de desidia ou deixadez.
En calquera caso a esas demandas hai que darlles tamén visibilidade porque aínda que a prioridade sobre o que hai que facer é subxectiva, que esas necesidades existen é normalmente obxectiva.
Campo de fútbol de Conxo
En Santiago o Partido Popular puxo o foco en esta ocasión no campo de fútbol de Conxo. O número de instalacións da cidade é enorme e sempre faltarán cousas por facer pero á vista das imaxes enviada polos populares esta instalación precisa dun plan axiña.
O concelleiro popular José Ramón de La Fuente reclámalle ao BNG que asuma as súas responsabilidades, xa que o departamento de Deportes é coñecedor do “esperpéntico” estado destas instalacións e se mantén de brazos cruzados, deixando que sexa a “sorte” a que faga que non teña pasado ningún suceso que logo haxa que lamentar.
De la Fuente engade que “A concelleira de Deportes tivo o arroxo de mentir diante de todos os veciños e veciñas no Pleno, cando afirmaba que se en algo se caracterizaba o departamento de deportes era por velar pola seguridade dos e das usuarias das instalacións deportivas e engadía que todas son salubres, de non ser así estarían pechadas”, cando a realidade é ben distinta e está á vista de todos”.
Escalinata do Campus Sur
A concelleira socialista (expulsada do partido pero aínda no grupo municipal ata a formalización do paso ao grupo mixto) céntrase na escalinata do Campus Sur , a que todo o mundo coñece como a escalinata “da Ferradura”.
A edil socialista levará unha iniciativa ao vindeiro pleno para que se traballe na posta a punto deste elemento escultórico que foi construída antes incluso que o propio Campus universitario. Apunta a existencia de chanzos “irregulares e soltos” e a un “importante deterioro” da pedra e pasamáns.
Estradas en Ames
Tamén o Partido Popular, en este caso de Ames, pon sobre a mesa as súas queixas que van de estradas. Os populares amienses apuntan á Deputación, a Xunta de Galicia e mesmo ao Ministerio de Transportes e demandan arranxos en distintas vías no municipio.
A voceira popular, Oliva Agra, levará a pleno unha moción sobre o estado de moitas estradas do norte do concello e explica que “As conexións co transporte urbano teñen moitísimas limitacións polo que os veciños están obrigados a utilizar o seu propio coche para circular por estradas que polo seu estado convértense en perigosas para quen vai ó volante pero sobre todo para os peóns”.
Concretan as necesidades en que as melloras nas estradas autonómicas e locais das parroquias de Ames, Lens, Ameixenda, Tapia e Piñeiro centráronse na reposición de firmes máis non se efectuaron intervención importantes na procura dunha mellor seguridade dos condutores e viandantes destas parroquias.
Un dos exemplos é o da AC-453 de titularidade autonómica, que vai de Roxos a Portomouro. Unha vía da rede secundaria moi utilizada, tanto a pé como en vehículo. En moitos tramos non existen beirarrúas que garantan a seguridade dos peóns o que obriga ás persoas que camiñan por eses tramos a compartir asfalto cos vehículos, co perigo que iso implica.
Oliva Agra ten claro que “o rural de Ames ten unha gran carencia no que se refire a beirarrúas e cada vez son zonas que soportan máis tráfico polo que a seguridade dos camiñantes debe ser prioritaria para todos. E desde o PP incluso consideramos que non estaría de máis facer unha avaliación seria para corrixir dunha vez por todas esas eivas alá onde sexa necesario”.
A voceira do PP amesán tamén pon o foco nun dos centros educativos do rural, o CEIP de Barouta. “As peticións da comunidade educativa de Barouta son máis que xustas. É máis, tratándose dun colexio xa terían que estar atendidas”. O CEIP de Barouta atópase ao carón da AC-453 e desde fai tempo a comunidade escolar está a reclamar unha serie de medidas que melloren a seguridade do entorno do centro educativo. É imprescindible controlar a velocidade dos vehículos, mellorar a sinalización e habilitar pasos peonís.
Por outra banda a estrada de titularidade provincial CP-0201 que une a aldea da Mámoa, na parroquia de Tapia, coa aldea de Pontemaceira, carece de beirarrúas en todo o seu percorrido polas principais aldeas das parroquias de Ames e Lens. O PP cree que é preciso dotar de beirarrúas esta estrada entre Seares de Arriba e o cruce coa AC-543 (na parroquia de Tapia) e a aldea de Lens.
Unha situación similar teñen que vivir día a día os veciños da aldea de Quintáns, na parroquia de Ames, que teñen que transitar pola cuneta para poder desprazarse polo núcleo. A maiores, compre poñer de manifesto que dende fai décadas non se actuou no firme desta estrada, o que xustifica as fochancas que se atopan na vía. Moitas destas deficiencias foron expostas coas achegas que o Partido Popular fixo ao longo dos anos ao Plan de Obras e Servicios da Deputación da Coruña, sin que ata a data tivesen acollida en ningún plan pese a que, como puntualiza Oliva Agra “non deixan de ser peticións moitas veces sinxelas e desde logo máis que xustas para mellorar a calidade de vida dos nosos veciños e ofrecerlle a seguridade viaria que merecen”.
