Compostela, 09/07/2026 – Antes de quince días Compostela estará un ano máis inmersa nas Festas do Apóstolo. Este mércores a concelleira Pilar Lueiro avanzou dous dos momentos destacados do programa. Por unha banda recupérase o “videomapping”, unha proxección sobre a fachada do concello que sempre sorprende polo realismo que acaba tendo.
O segundo dos momentos a anotar será o peche das festas coa banda The Rapans. Tras encher o multiusos de Sar, cunha resposta do público que sorprendeu ata aos propios músicos, agora estará na emblemática Quintana para pechar as festas do Apóstolo.
Como é tradicional, as festas incluirán folclore, orquestras, cabezudos e por suposto os espectáculos pirotécnicos do 24 e o 31 de xullo. Ademais, as atraccións estarán na Alameda a partir do sábado 18.
“Videomapping”
Pilar Lueiro explicou que o espectáculo de ‘videomapping’ sobre a fachada do Pazo de Raxoi conta co financiamento do imposto de estadías turísticas que o Concello aplica desde outubro, cun orzamento duns 100.000 euros.
Trátase dunha proposta visual inmersiva que transformará o Pazo de Raxoi nun lenzo vivo, combinando creatividade, tecnoloxía e patrimonio nunha experiencia pensada para sorprender a veciñanza e visitantes.
No ano 2017 (aínda con fogos de artificio desde o tellado) o “videomapping” converteu o Pazo de Raxoi nun hórreo no que estaban as pandereteiras de “Cantigas e Agarimos”, algo que podedes ver no vídeo que publicamos aquel ano na nosa canle de Youtube
Horario do ‘videomapping’
Este espectáculo ten unha duración de nove minutos e poderase ver na praza do Obradoiro os días 24, 25 e 26 de xullo. A noite do venres 24 haberá pases cada 15 minutos entre as 00.00 e as 2.00 horas, mentres que as dúas noites seguintes serán entre as 23.00 e a 1.00 horas.
Este videomapping está deseñado pola empresa Quatro Gatos e será poxectado por Art Music como unha experiencia para todos os públicos que pon en valor o patrimonio arquitectónico de Santiago a través das novas tecnoloxías, ofrecendo unha mirada contemporánea sobre un dos edificios máis representativos da cidade.
Fogos do Apóstolo
Os tradicionais fogos do Apóstolo lanzaranse, coma o ano pasado, o día 24 de xeito sincronizado desde tres localizacións con variedade de efectos de cores a partir das 23.30 horas.
A Alameda, a escalinata das Fontiñas (parque Carlomagno) e a Cidade da Cultura son os puntos de tirada do espectáculo pirotécnico, permitindo a un gran número de composteláns e compostelás e visitantes presenciar o espectáculo desde diferentes localizacións da cidade. O día 31 os fogos botaranse desde a Alameda.
Concerto de The Rapants
O venres 31 de xullo as festas do Apóstolo chegarán ao seu final e farano coa alegría e a sonoridade da banda galega The Rapants, que subirá ao escenario da praza da Quintana.
As actuacións musicais inclúen artistas internacionais como Lila Downs e Belém Tajes, que actuarán a noite do 24 tamén na Quintana.
Ademais, mantéñense citas clásicas coma os cabezudos, as orquestras na Alameda, a Festa Pícara, o día 23; as Xornadas do Folclore, o sábado 25; ou o Día do Traxe Galego, o domingo 26. As atraccións estarán instaladas na Alameda desde o sábado 18.
A concelleira de Festas avanzou que a persoa encargada de dar o pregón así coma o cartel das festas ao completo se desvelarán nos vindeiros días.
