A nova exposición do Gaias propón unha ollada a 125 anos de pintura galega na mostra “As estacións do ano”. Unha colección que xoga coa temperatura, as cores, texturas e os sons asociados á primavera, o verán, o outono.
A mostra reúne máis de 80 pezas de 63 artistas procedentes das coleccións de arte públicas e privadas máis destacadas de Galicia, Está comisariada pola artista plástica Mónica Alonso e abrirá as súas portas ao público o día 26 e poderá visitarse, con entrada de balde, ata o 6 de setembro.
“As estacións do ano” recolle pezas dos séculos XX e XXI e está concibida como experiencia sensorial e inmersiva. Xogando coa colocación das obras no espazo, coa temperatura, as cores, os sons e as texturas, constrúese un itinerario singular pola historia da arte galega.
Unha viaxe desde o Movemento Rexionalista de comezos do pasado século ata as xeracións máis novas que están a gañar recoñecemento a nivel estatal e internacional. Entre as pinacotecas que colaboraron destacan as Coleccións de Arte de Afundación e de Abanca.
Tamén se exhiben obras das fundacións María José Jove, Luis Seoane e Eugenio Granell, así como do Centro Galego de Arte Contemporánea, o Museo de Belas Artes da Coruña, o Museo de Pontevedra e o Museo Provincial Lugo, ou as galerías Nordés e Trinta.
A selección reúne grandes figuras históricas da arte galega, como Castelao, Eugenio Granell, Laxeiro, María Antonia Dans ou Luis Seoane, con destacados creadores contemporáneos, entre eles Manuel Vilariño, Francisco Leiro, Antón Lamazares, Manolo Paz, Berta Cáccamo ou Menchu Lamas.
Xunto a eles, a mostra abre espazo ás novas voces da creación actual: artistas plásticos como Mar Vicente e Rosendo Cid; cineastas e creadores visuais como Lois Patiño e as irmás Noa e Lara Castro de Lema; artistas sonoros como Berio Molina, e unha nova xeración de escultores representada por Mar Ramón Soriano e Pablo Barreiro, entre outros moitos.
Mergullarse na experiencia artística
“As estacións do ano”, abre as súas portas o próximo 26 de febreiro e poderá visitarse con entrada gratuíta ata o 6 de setembro. A mostra contará cun programa de visitas comentadas e didácticas, especialmente deseñadas para mergullarse nos ciclos da natureza e a súa influencia a través da arte contemporánea.
Ademais, no marco da liña de traballo Gaiás Inspira, programaranse actividades lúdicas e divulgativas pensadas para complementar e amplificar os contidos da exposición, transformando o Museo Gaiás nun espazo vivo e aberto á participación de todos os públicos.
Saúdos do Gabinete de Comunicación da Consellería de Cultura, Lingua e Xuventude
