Bisbarra, 16 de decembro do 2024 – As bicicletas son para Papa Noel, iso é o que pensa polo menos o concello de Arzúa que ven de convocar unha “papanoelada cicloturista”.
A Concellería de Turismo ven de convidar á veciñanza a “poñerse o pucho de Papá Noel e desfrutar dunha mañá de deporte, diversión e moito espírito festivo” na I Papanoelada Cicloturista do Concello de Arzúa. A cita o domingo 22 de decembro, co murmurio da lotería de fondo, con saída da Praza de Galicia.
Tanto sexas de moito pedalear como de pouco terás opcións. A primeira ruta é por “Se che gusta pedalear con ritmo”, 17 km pola contorna de Arzúa, pasando polas Barrosas e outros recunchos cheos de encanto. Saída ás 09:00 h.
A segunda é especial para os máis pequenos e as súas familias. Un percorrido de 4 km pensado para que todos poidan pasalo en grande con saída ás 11:00 h. A proposta é disfrazarse de Papa Noel ou engadir un toque navideño. Desde Arzúa din quere encher as rúas “de cor, sorrisos e moita maxia”.
Non tes bici? tranquilo, haberá un servizo de préstamo de bicicletas para que ninguén quede sen participar.
Ao rematar as rutas unha deliciosa chocolatada con biscoito agrada aos participantes para repoñer forzas e seguir co espírito festivo.
Inscricións gratuítas
Inscríbete ata o xoves, 19 de decembro, enviando un correo a nadalarzua@gmail.com ou cubrindo o formulario que atoparás no seguinte enlace.
Unha actividade para todos
Begoña Balado, concelleira de Turismo, Comercio e Promoción Económica, anima a todo o mundo a unirse “Que mellor maneira de vivir o Nadal que pedaleando pola nosa vila, gozando da contorna e compartindo risas con amigos e familiares? Será unha mañá inesquecible para todos, desde os máis pequenos ata os maiores”.
