Arzúa, 2 de setembro do 2020 – O alcalde de Arzúa, José Luís García, vén de asinar un escrito no que reclama o mantemento da liña de autobús que facía o percorrido Vila de Cruces Coruña.
O escrito será remitido á Xefatura Territorial da Consellería de Infraestruturas e Mobilidade da Xunta de Galicia. A solicitude é compartida polos concellos de Mesía, Vila de Cruces, Boimorto, Carral e Abegondo; todos eles directamente afectados por esta decisión do goberno autonómico. O documento insiste na necesidade de que a Xunta dea un paso atrás na súa intención de suprimir a única liña de autobús que comunica estes concellos entre sí e coa cidade da Coruña.
A eliminación desta liña provoca un descontento xeneralizado de toda a veciñanza dos concellos polos que discorre, considerando isto un grave prexuízo para os municipios do rural. Según o concello “accións desta índole chocan de cheo coas mensaxes propagandísticas que se fan chegar á opinión pública da aposta por un rural vivo e dinámico”.
