O Camiño Francés tiña a presidencia en Triacastela que cede o cargo ao municipio de Arzúa. A concelleira que asume o posto e Begoña Balado e a Vicepresidencia estará a cargo de Melide e do tenente de alcalde Xosé Igrexas.
A presidencia da Mancomunidade de Municipios Galegos do Camiño Francés achégase a Santiago xa que estará en Arzúa, quedando a Vicepresidencia en Melide. Un cambio que se produce no organismo cada dous anos e que segue un orde alfabético.
A responsable da presidencia será a concelleira de Turismo, Promoción Económica, Comercio e Acción Urbana de Arzúa, Begoña Balado. Pola súa banda Xosé Igrexas, tenente de alcalde de Melide, asume a vicepresidencia.
A nova presidenta, Begoña Balado, afirmou que afronta esta nova etapa “con ilusión e responsabilidade, co compromiso de seguir traballando pola promoción do tramo galego do Camiño Francés e pola súa posta en valor como un dos itinerarios máis emblemáticos e transitados da ruta xacobea”.
Engadiu que “é un reto moi importante para min, porque creo na promoción e no turismo, que son a miña paixón. É unha responsabilidade que asumo con orgullo e espero estar á altura dos anteriores presidentes, aos que quero agradecer o seu traballo”.
Balado destacou ademais que a Mancomunidade “é unha das entidades máis importantes do noso país, e quero recalcar o seu bo funcionamento, xa que nela colaboran once concellos de diferentes ideoloxías políticas, pero todos deixamos esas diferenzas á marxe. De aí o éxito e o bo entendemento que sempre caracterizou esta entidade”.
A presidenta avanzou tamén que entre os obxectivos inmediatos está “impulsar novas iniciativas que melloren a experiencia dos peregrinos e dean visibilidade aos recursos patrimoniais, naturais e gastronómicos de cada municipio”. Ademais, subliñou que “temos moitos proxectos e moitas sorpresas por diante, tanto para a promoción do Camiño como para dinamizar a actividade económica dos once concellos que forman parte da mancomunidade”.
