Bisbarra, 23 de xaneiro do 2025 – O Departamento de Cultura de Arzúa continúa coa programación dos primeiros meses de ano baixo o título de Encontros culturais de inverno.
O obxectivo é converter estas reunións nun lugar de encontro para as noitiñas de inverno con cine, música, literatura e actividades nas parroquias de Arzúa, entre outras propostas dirixidas a públicos de todas as idades.
Esta programación achegarase as parroquias cun programa titulado As parroquias contan. Ofrecerase unha sesión de contos para todos os públicos a cargo do cómico arzuán Xan Veiga e, ao remate, unha chocolatada á que estarán convidadas todas as persoas asistentes.
A primeira noitiña nas parroquias de Arzúa será este venres, 24 de xaneiro, no local social de Santo Estevo do Campo ás 20:30 h. E contarase con outra o venres 14 de febreiro á mesma hora no local social de Burres. A entrada será libre e de balde.
O concelleiro de Cultura, José Luís García, anima “a participar nestes encontros pensados para dinamizar culturalmente tamén as nosas parroquias e para crear un espazo de socialización entre veciñas e veciños”.
About the Author
