Bisbarra, 8 de febreiro do 2022 – Arzúa, Oroso e negreira presentaron xa a súa programación de entroido mentres que outros concellos traballan en ela cun ollo posto nas restricións.
A Asociación da Festa da Filloa valora se celebrala, Vedra inclúe na programación da Camelia un atranque de Xenerais infantís e os propios Xenerais da Ulla están acabando de rematar unha programación de Entroido que non deixa de ser complexa de deseñar.
O entroido en Arzúa
O Concello de Arzúa organiza para o Entroido cinco días de actividades que darán comezo o sábado 12 cun obradoiro de iniciación á batucada. Será no primeiro andar do Multiusos Terra do Queixo ás 17:00 para nenas e nenos de 8 a 14 anos e ás 18:30 para persoas de 15 anos en diante. As prazas son limitadas e as inscricións están abertas no Departamento de Cultura ou chamando ao 981500222.
O domingo 20 Arzúa acollerá desde as cinco da tarde o Concurso de Disfraces no Multiusos Terra do Queixo onde se desenvolverán as actuacións dos participantes e se fará a entrega dos premios que superan os dous mil euros repartidos entre as categorías de comparsas, grupos, individual infantil e individual adulto.
As actividades continúan o domingo de Entroido, 27 de febreiro, co grupo de gaitas O Bringuelo que animará coa súa música as rúas da vila de doce a dúas do mediodía.
Na xornada do luns 28 terá lugar o contacontos musicado O son que me arroupa a cargo da Asociación Antonio Gandoy. Unha proposta teatral e musical para público infantil e familiar, que presenta as pezas do traxe tradicional feminino a través de fragmentos de cantigas tradicionais. A función terá lugar ás seis da tarde no primeiro andar do Multiusos Terra do Queixo.
A programación complétase na tarde do martes de Entroido, o día 1 de marzo, cunha festa de inchables en horario de 16:00 a 19:00 e, a continuación, levarase a cabo unha actuación para toda a familia a cargo de Circus Maginifucus cunha combinación de teatro, acrobacias, malabares, clown e moitas risas. Estas actividades realizaranse na Praza de Galiza ou, en caso de mal tempo, no Pavillón Polideportivo de O Viso.
O entroido de Negreira
O Concello de Negreira organiza unha festa de entroido segura ao aire libre, despois de que a Consellería de Sanidade publicara o protocolo autorizando a celebración de desfiles. O tradicional desfile de carrozas e comparsas do sábado de Entroido e, o concurso infantil de disfraces do luns de Entroido, serán os dous actos principais.
O sábado, día 26 de febreiro, as actividades comezarán ás 16:00 horas coa concentración dos participantes no Campo da Feira. E ás 17:00 horas, comezará o desfile a través da Carreira de San Mauro. Ás 20:00 horas terá lugar a entrega de premios coa presenza dos humoristas: Tonhito de Poi e Alberto Piñeiro, así como a actuación dun dúo musical na praza do Concello.
Os premio para as mellores carrozas e comparsas levarán 1.000 euros, o de grupos 200 € e o de individual ou parellas 100 €. Haberá tamén premios económicos para os segundos e terceiros de cada categoría e mesmo os cuartos de carrozas e comparsas.
Entregarase ademais o Premio simpatía “Juan Varela Areoso” que sopón 60 €.
O concurso de disfraces infantil contará con dúas categorías, nenos/as de 1 a 6 anos e, nenos/as de 7 a 16 anos. Os premios van desde reloxo intelixente ou unha tablet ata un cheque regalo de 150 euros.
Oroso tamén celebrao entroido
O sábado 26 de febreiro pola tarde, as comparsas participantes farán un percorrido polas rúas de Sigüeiro. O concello repartirá máis de 3.000 euros en premios para as mellores comparsas e disfraces en categoría Adultos e Infantil.
Á marxe desta actividade, Oroso celebrará un concurso de máscaras e dous obradoiros, un de máscaras venecianas e outro de elaboración de filloas e rosquillas de Entroido.