AstroGalicia Final
Bisbarra, 13 de decembro do 2024 – O Nadal de Arzúa incluirá este ano unha das citas máis interesantes da bisbarra, o encontro denominado AstroGalicia os días 21 e 22.
O Departamento de Cultura do Concello destaca AstroGalicia como unha das novidades da programación de Nadal. Consiste nun espazo de lecer e divulgación científica ao redor da astronomía, que conta co apoio as asociacións galegas de amadores da astronomía.
O evento, cualificado como a festa galega das estrelas, celebrarase no Multiusos Terra do Queixo de Arzúa os días 21 e 22 de decembro con diversas actividades encamiñadas a achegar a astronomía a todos os públicos. Durante toda a fin de semana sucederanse en AstroGalicia obradoiros, charlas, seminarios, exposicións e observacións.
As charlas, impartidas sempre por astrónomos ou astrónomas profesionais en activo, teñen un nivel divulgativo e son de acceso libre. A maiores, as persoas inscritas poden participar en obradoiros de diferentes niveis dende a iniciación á astronomía a seminarios de nivel avanzado.
AstroGalicia está organizado polo proxecto Ceos Galegos e conta co apoio das asociacións AstroVigo, Asociación Astronómica Rías Baixas, Club Compostelán Vega de Astronomía, Agrupación Astronómica Coruñesa Ío, Asociación Astronómica Sirio e a Asociación Galega para a Comunicación e a Cultura Científica e Tecnolóxica.
A edición 2024 é patrocinada polo Concello de Arzúa e conta coa colaboración do C.R.D.O.P. Arzúa-Ulloa e da Fundación Ciencia, Ceo e Cultura. Pódese consultar toda a información actualizada na páxina web ceosgalegos.com.
