Bisbarra, 15 de maio do 2024 – Arzúa celebra este venres o Día das Letras Galegas co espectáculo “Des(a)fiada” do grupo Zoelas.

Zoelas é un grupo que emerxe nas terras rurais do interior de Galicia. Tres voces femininas e arranxos pouco comúns da man de instrumentos como a zanfona, a requinta ou a guitarra, acompañan ás letras de composición propia tomando como principios e valores básicos a visibilidade da muller, o idioma e o rural.

A cita será na Casa da Cultura ás 19:00 horas coa entrada libre e de balde ata completar a capacidade. O proxecto-espectáculo “Des(a)fiada” pretende analizar cal foi a posición da muller no rural de Galicia nos grandes acontecementos da historia a través dos seus propios testemuños.

Non é este o único evento que, dentro da programación Primavera de Cultura, homenaxea ás nosas Letras. Xa que, por exemplo, o vindeiro 31 de maio os escolares de primaria de Arzúa participarán nun contacontos que dará a coñecer a figura de Luísa Villalta e a súa obra.

Dende o Departamento de Cultura tamén se recorda que esta semana, do xoves 16 ao sábado 18 son os últimos días para visitar na Capela da Madanela a exposición de pintura e fotografía do colectivo Lucet con obras de nove artistas que abre en horario 18:30 a 20:30 horas.

O concelleiro de cultura, José Luís García, convida a toda a veciñanza e visitantes a asistir ás diferentes propostas culturais que se ofrecen “co ánimo de defender e promover o uso e coñecemento da nosa lingua, algo que nos propoñemos durante todo o ano dende a concellaría que dirixo, pero que esta semana corresponde visibilizar máis ca nunca”.