Arzúa, 18 de marzo do 2018 – O Centro de Formación EFA Piñeiral de Arzúa acolleu o primeiro encontro de emprendedores do Camiño Francés, no que participaron unha trintena de profesionais.
A este encontro de emprendedores acudiron responsables de oficinas do Peregrino, empresarios de establecementos hoteleiros, restauración, de transporte, técnicos en proxectos europeos para o desenvolvemento rural e docentes entre outros perfís profesionais. O evento marcouse como obxectivo descubrir as necesidades formativas dos empresarios e emprendedores vencellados ó Camiño, a análise dos valores e riquezas do patrimonio cultural inmaterial do Camiño de Santiago así como o intercambio de experiencias e opinións que poidan conducir a acadar un consenso que de pé á elaboración dun código de boas prácticas deontolóxico.
Conchita Bernárdez, unha das organizadoras do evento, explicaba que “Todos somos uns apaixoados co Camiño, esa é a esencia, todas as nosas empresas teñen nome propio, o noso, razón pola que se cabe debemos esixirnos unha maior calidade no noso servizo, e non nos cabe ningún tipo de dúbida de que traballar unidos será a mellor opción para conseguilo; interactuar xuntos danos máis fortaleza”.
