Bisbarra, 29 de novembro do 2024 – A Concellaría de Turismo, Promoción económica e Acción urbana do Concello de Arzúa presenta o Día do Comercio Local que se celebrará o domingo 8 de decembro.
Arzúa confirma a participación de vinte e nove establecementos aos que, nunha reunión este xoves, presentoulles a programación preparada para ese día.
Aproveitando a proximidade da campaña de Nadal e a feira quincenal, o Arzúa organiza varias actividades na rúa que se poderán desfrutar de xeito gratuíto durante todo o evento e tamén nos días previos.
O programa de actos comezará o día 5 de decembro coa apertura dun Carrusel que estará instalado na Praza de Galiza e que, na súa primeira xornada, estará operativo de 16:00 a 21:00 h. Os días 6, 7 e 8 abrirá en horario de 11:00 a 14:00 h. e de 16:00 a 21:00 h.
Para subir ao Carrusel será necesario presentar un tícket que se poderá conseguir por mercas nos establecementos participantes dende o luns día 2. Por cada 10 euros de merca, recibirás un tícket.
Durante a tarde do 8 de decembro tamén haberá diferentes inchables para público infantil, así como xogos e obradoiros para todos os públicos. Estas actividades terán lugar na Praza de Galiza en horario de 16:00 a 20:00 h.
Para animar a xornada actuará a Charanga Santa Compaña de xeito itinerante na praza e polas rúas da vila a partir das 17:30 h. e a Rondalla Moraima fará unha ruta polos locais hostaleiros participantes a partir das 19:30 h. acompañando así a ruta de tapas.
Paralelamente, durante toda a xornada, os comercios inscritos ofrecerán descontos de ata o 70%, sorteos, agasallos e ofertas especiais en locais de todo tipo como zapaterías, tendas de roupa, librarías ou xoierías, entre outros.
A concelleira responsable da área de promoción económica, Begoña Balado, manifestou que “desde o goberno local quéreselle dar continuidade a este evento e impulsalo dotándoo de máis orzamento e con novas propostas arredor del”. Tamén lles quixo transmitir que se está a traballar “en novas iniciativas de dinamización comercial e de apoio ao comercio de proximidade con diferentes accións a desenvolver no vindeiro Nadal e no próximo ano”. Ademais, Balado escoitou as ideas, inquedanzas e propostas dos presentes na xuntanza.
