Arzúa ven de rematar unha importante reforma que pon en valor un dos seus espazos máis emblemáticos, a Fervenza das Hortas, Situada na parroquia de Dombodán, contou cunha subvención da Axencia de Turismo de Galicia de 30.000 euros que se completaron, ata os 37.772,79 euros totais, con recursos propios.
A actuación permitiu mellorar de maneira notable a baixada á Fervenza, incorporando un espazo de descanso, aparcadoiro, novo mobiliario, plantación de árbores e unha mellora xeral dos accesos. A concelleira de Turismo, Begoña Balado, destacou a importancia desta intervención para o futuro turístico do municipio. “Con esta actuación damos un paso máis na posta en valor dos nosos espazos naturais, facéndoos máis accesibles, seguros e atractivos tanto para a veciñanza como para as persoas que nos visitan”, sinalou.
Balado subliñou tamén que “a Fervenza das Hortas é un enclave de gran beleza natural que merecía unha mellora destas características, sempre desde o respecto ao entorno e apostando por un modelo de turismo verde e sostible”.
Tamén puxo en valor o traballo técnico realizado: “Conseguimos esta subvención grazas a presentar un proxecto completo, ben fundamentado e cunha tramitación áxil, o que demostra a eficacia do traballo que se está a facer desde o Concello”. Desde o goberno local destacan que esta intervención permitirá seguir reforzando a oferta de turismo de natureza en Arzúa, mellorando a experiencia das persoas visitantes e contribuíndo á conservación e desfrute responsable dun dos espazos naturais máis singulares do municipio.
