PROGRAMACION
Bisbarra, 15 de xaneiro do 2025 – Arzúa ven de presentar os “Encontros clásicos de inverno” nos que destaca a proxección de varios filmes do denominado cine clásico.
Esta programación de Arzúa pretende ser, segundo o concello, “un lugar de encontro para as noitiñas de inverno con cine, música, literatura e actividades nas parroquias, entre outras propostas dirixidas a públicos de todas as idades”.
Este mesmo venres, 17 de xaneiro, comezará esta programación coa proxección de “La gata sobre el tejado de zinc” na Casa de Correos ás 20:30 h. Haberá presentación do filme a cargo dun experto en cinema e degustación de chocolate quente e doces variados.
Será necesaria inscrición previa no teléfono 981500222 ou no correo cultura@concellodarzua.com. Cada persoa poderá reservar a un máximo 4 prazas, sendo as mesmas limitadas.
A cinta, do ano 1958, conta con Elizabeth Taylor e Paul Newman no reparto e narra como a inminente morte do ancián patriarca dunha acomodada familia crea unha gran tensión ambiental. O concelleiro de Cultura de Arzúa, José Luís García, anima “a participar nestes encontros pensados para que a veciñanza comparta a través da cultura experiencias e tempo de socialización durante os, moitas veces, apáticos días de inverno”.
