O Departamento de Cultura do Concello de Arzúa convoca un ano máis o tradicional concurso de disfraces de Entroido. Celebrarase o sábado 7 de febreiro ás 17:00 h. no Multiusos Terra do Queixo e repartirá máis de dous mil euros en premios para catro categorías.
Despois do éxito de anos anteriores no que se seguen aumentando as cifras de participantes, este ano mantense a distribución das diferentes categorías e o formato no que se levou a cabo o concurso de Entroido en edicións pasadas.
Poderanse presentar comparsas dun mínimo de nove compoñentes optando a premios de 550, 300 e 150 euros. Haberá un apartado de grupos de entre dúas e oito persoas con tres premios que ascenden a 300, 200 e 120 euros. Por último, establécense dúas categorías individuais, unha infantil de 0 a 17 anos e outra para adultos de 18 anos en diante.
Os premios no Entroido 2026 son de 120 e 80 euros para os primeiros e segundos postos, respectivamente de cada modalidade. Co fin de fomentar a participación local, mantense tamén o premio Simpatía dotado de 100 euros dirixido a unha comparsa ou grupo do municipio que non acadara ningún dos premios anteriores e que sume a maior puntuación no apartado simpatía da valoración do xurado.
O concurso celebrarase de novo co público sentado e cos participantes facendo a súa intervención sobre escenario nunha gala que contará coa actuación do alumnado das escolas municipais de Danza moderna.
Para participar no concurso hai que inscribirse previamente no Departamento de Cultura ou chamando ao 981500222 tendo de prazo ata o 5 de febreiro, en horario de 8:30 a 14:00 h. Pódense consultar as bases que rexen o concurso na páxina web arzua.gal.
A programación completarase coa celebración do tradicional Baile da tarde do martes de Entroido.
