Arzúa, 23 de novembro do 2021 – A área de Igualdade do concello de Arzúa presentou as actividades conmemorativas do 25N.
Arzúa implicase con diversas actividades no Día Internacional Contra a Violencia de Xénero, 25N. O departamento que dirixise o alcalde, José Luís García, deseñou unha programación destinada especialmente á xente moza e que tratará de sensibilizar sobre esta lacra social.
Arzúa porá o foco sobre as mulleres, principais vítimas de acoso, extorsión, espionaxe cibernético e outras formas de agresión que se producen a través das novas tecnoloxías. Dende a área de Igualdade Municipal organizouse para estes días unha charla sobre ciberseguridade que se impartirá no IES de Arzúa. Desenvolverase ao longo de dúas sesións, dirixida aos alumnos e alumnas de primeiro e segundo de Formación Profesional Básica.
A pandemia ocasionada pola covid-19 no último ano e medio non fixo máis que multiplicar os actos de agresións perpetrados mediante o correo electrónico, os sistemas de mensaxería ou as redes sociais. Persoal técnico da área de Igualdade Municipal salienta que “as mulleres a nivel mundial teñen moitas máis probabilidades de ser atacadas en internet ca os homes. As agresións no ámbito tecnolóxico dirixidas a mulleres son máis comúns e dun carácter máis violento”. Sinalan, ademais, que os expertos en ciberseguridade admiten que esta problemática cobrará maior relevancia afectando especialmene ás adolescentes.
Para tratar de previlo, o coloquio sobre ciberseguridade que se impartirá aos escolares arzuáns irá acompañado da presentación dunha guía sobre prevención e acción contra os perigos da rede.
No mesmo centro educativo terá lugar unha charla-coloquio con Ana Saavedra, membro da Asociación Mirabal, que, dende a súa experiencia como vítima de violencia de xénero, falará sobre a importancia da detección e prevención da violencia.
Os alumnos de primeiro da ESO participarán, ao longo de cinco sesións, na realización de talleres de Rap cunha temática común, a loita incansable contra a violencia de xénero dende o ámbito educativo e social.
