Compostela, 27/03/2026 – O Pasado martes tivemos a sorte de participar nunha degustación de arroces con denominación de orixe, D.O., que acercan estes días o sabor da Albufera valenciana a Compostela.
O Café de Altamira organiza unhas xornadas ata o vindeiro día 29 nas que, ao mediodía, calquera poderá degustar o sabor tan particular da D.O.de Valencia. Un produto único, cultivado nun humidal tan especial como a Albufera.
Na degustación os xornalistas puidemos escoitar as explicacións de todo un referente como é Santos Ruiz, xerente da D.O. e cunha traxectoria vinculada ao produto que o levou a participar en foros como Madrid Fusión, colaborar en publicacións especializadas, e converterse nun dos mellores divulgadores do arroz de Valencia.
Falamos con el ao remata da degustación e comezamos preguntado pola D.O. e polo momento que vive, unha denominación que crece anualmente o que da idea do bo momento polo que pasa.
Hai unha parte medioambiental de extrema importancia. Un arroz cultivado nun humidal como a Albufera vive tamén en constante risco polo cambio climático. Santos Ruiz recoñece que o estado é bo pero que faría falta máis auga.
Aproveitamos a preguntar polo papel das D.O. que é a veces motivo de debate. O produtor non sempre entende a importancia de distinguirse aínda que no caso de Valencia si se conseguiu. O experto cre que a D.O. nace para protexer ao consumidor e non para promocionar o produto.
Rematamos pedindo consello. Calquera que intentara facer unha paella sabe da complicación e a gran cantidade de variables que entran en xogo. O certo é que Santos Ruiz o que recomenda é practicar, practicar moito.
Ata o día 29, antes de meterse a facer unha paella en casa, poden probar as distintas versións que cociñan no Café de Altamira (no enlace podedes reservar e mirar todo o que ofrecen). En Lindeiros somos máis de contar a historia que de facer crítica que para iso xa hai expertos, o que podemos dicir é que estaban todos boísimos e que o trato foi do máis agradable, máis non se pode pedir.
