Compostela, 2 de marzo do 2021 – A Asociación de Familias de Menores Trans, Arelas, ven de presentar unha unidade didáctica de cara ao 8M.
Arelas leva tempo traballando con centros educativos de toda Galiza, tratando de achegar a todo o alumnado a diversidade de identidades, orientacións e familias, loitando por erradicar a LGTBIfobia.
Educación para a diversidade
O colectivo Arelas busca con estes materiais mellorar e ampliar as accións formativas presenciais que fan nas aulas co alumnado. O obxectivo e que calquera persoa, mesmo allea á entidade, poida seguir visibilizando e formándose sobre estas realidades dende unha mirada positiva e transformadora (docentes, alumnado, familias,..).
Arelas presenta o material con motivo da celebración do 8 de marzo, día da muller, como unha ferramenta contra a discriminación e a invisibilidade das mulleres trans. Trátase de darlles o seu espazo na loita feminista contra as violencias e desigualdades machistas e para que supoñan un conxunto máis representativo da sociedade. Tamén ten por obxectivo ofertar referentes positivos ás nenas e rapazas trans, sobre todo no ámbito educativo.
Cartaces
No material destaca a realización de 10 ilustracións que aparecen na guía docente con información biográfica engadida e están pensados para que se impriman en A3 para colocar en corredores do centro, na aula ou proxécténse na aula.
Nos cartaces aparecen referentes entre os que destaca a galega Laura Bugallo, sindicalista e activista nada en Compostela e posuidora do Premio Nicolás Salmerón 2011 na categoría de Defensa das Liberdades Sexuais.
