Rois, 13 de decembro do 2021 – O Consello da Xunta autorizou o convenio de colaboración co Concello de Rois para construción da nova depuradora de Urdilde.
A depuradora suporá un investimento de 915.000 euros e poderá tratar as augas residuais de 546 habitantes equivalentes que residen no núcleo urbano da Calle e no de Macedos. As obras teñen un prazo de execución de oito meses
A Consellería de Infraestruturas e Mobilidade, a través de Augas de Galicia, cofinanciará a actuación nun 80%, achegando 732.000 euros. O Concello Rois contribuirá ao financiamento do 20% restante, destinando 183.000 euros.
O Pleno da Corporación de Rois xa aprobara no mes de setembro por unanimidade a firma do convenio con Augas de Galicia para construír esta importante infraestrutura para o municipio.
Augas de Galicia tamén levará a cabo a contratación e execución das obras da depuradora, así como a súa dirección e xestión ata completar a súa finalización.
Esta intervención será financiada pola Unión Europea, no marco do eixe REACT UE do programa operativo Feder Galicia 2014-2020, como parte da resposta da Unión á pandemia da COVID-19.
O actual sistema de depuración de que dispón o núcleo da Calle, en Urdilde, presenta deficiencias de funcionamento, carencias respecto da accesibilidade para poder realizar as operacións de mantemento e unha elevada distancia ao punto de vertedura.
A Xunta e o Concello coinciden na necesidade de abordar a mellora do sistema de depuración das augas residuais deste núcleo, a través da construción dunha nova depuradora en Urdilde, localizada máis preto do punto de vertedura.
Deste xeito, garantirase o cumprimento dos obxectivos de vertedura ao medio receptor, dimensionando a depuradora para a conexión futura de toda a parroquia á rede de saneamento, de tal modo que a depuradora proporcione tratamento á totalidade das augas residuais producidas na área.
Segundo o proxecto redactado por Augas de Galicia, as obras obxecto do convenio autorizado onte polo Executivo autonómico comprenden a execución dunha nova estación de tratamento de augas residuais con sistema de depuración por biodiscos e o desmantelamento da depuradora actual de Urdilde, que se manterá en funcionamento ata a entrada en servizo da nova infraestrutura.
O novo sistema estará dotado de arqueta de chegada, by-pass xeral, desbaste mediante dobre canle, pretratamento mediante tanque Imhoff, con zona de decantación e zona de dixestión, tratamento biolóxico e medida de caudal de auga tratada.
Ademais, executaranse 519 metros de colector desde a estación actual ata a arqueta de entrada da futura depuradora, e disporase de 61 metros de colector desde a arqueta de saída ata o punto de vertedura. Tamén se acondicionará o acceso á nova depuradora.
