Atrás quedou o debate sobre a utilidade da Deputación. Plans como o Único, que garante un reparto equitativo dos recursos; ou o de Emprego Local, como en este caso, abalan o traballo do ente provincial.
En Ordes son 33 as empresas e persoas autónomas que se benefician das distintas liñas de axuda do Plan de Emprego Local (PEL). O programa está dirixido a apoiar a creación e consolidación de emprego no ámbito local.
A deputada de Emprego, Industria e Medio Ambiente, Rosa Ana García, visitou unha das empresas beneficiarias, ORDESTAR S.L., dedicada á reparación de vehículos e constituída en 2015.
A empresa recibiu unha subvención da Deputación de 15.000 euros a través da liña PEL-PEMES, destinada á contratación de persoal, que financia ata o 70% dos custes totais (salario e Seguridade Social) das novas contratacións durante o prazo de un ano.
As 33 axudas concedidas pola Deputación en Ordes corresponden ás diferentes modalidades do programa, que inclúen incentivos á contratación, apoio ao emprendemento e á actividade das pemes e persoas autónomas.
O obxectivo é reforzar o tecido empresarial local, facilitar a creación de novos postos de traballo e contribuír á estabilidade das empresas do municipio. Rosa Ana García destacou que “o PEL permite apoiar de forma directa ás pequenas empresas e ás persoas autónomas que xeran emprego nos nosos concellos, ofrecendo recursos para contratar persoal, ampliar a súa actividade ou iniciar novos proxectos”.
A deputada subliñou que a continuidade do programa ao longo dos anos permitiu consolidar unha rede de apoio estable ao tecido produtivo local.
Na última década, o Plan de Emprego Local contribuíu á creación de máis de 8.000 empregos na provincia da Coruña, converténdose nunha das principais ferramentas da Deputación para impulsar a actividade económica nos concellos.
O programa mantén unha aposta sostida polo apoio ás pequenas e medianas empresas, autónomos e emprendedores, facilitando financiamento directo e adaptado ás necesidades reais de cada proxecto.
