Teo, 7 de xullo do 2017 – A ANPA Rabadela, do colexio infantil de Calo, ven de enviar unha carta ao conselleiro de Educación para solicitar que se manteña aos 8 profesores de infantil con praza fixa.
A carta di así:
Sr. Rodríguez González:
Somos a asociación de nais e pais do alumnado A Rabadela e escribímoslle esta carta coa confianza de que escoite esta nosa alegación desesperada en nome da comunidade educativa do Colexio de Educación Infantil e Primaria de Calo, en Teo, para que manteña as oito profes de Infantil con praza definitiva no centro.
Porque, aínda que a matrícula de 3 anos para o curso que vén é de vinte nen@s, desde hai meses está confirmada a permanencia das oito mestras. Coñecendo a previsión de matrícula baixa, o colexio traballa con dúas posibilidades: Crear dous grupos de dez ou un de vinte con tres profes de apoio en Infantil, esta última opción é a elixida ata o 22 de xuño.
Contamos con alumnado con necesidades específicas que agradecerá enormemente a atención prestada. A mestra que teñen intención de desprazar sería só por este ano pois, o seguinte curso, xubílase unha compañeira de Infantil. A profe xerou un vínculo emocional moi forte co seu
alumnado de 3 anos e as familias estamos facendo todo o posible para que poida rematar esta etapa coa mesma mestra.
Se finalmente a desprazan, este grupo de cativ@s tería unha profesora diferente en cada curso da etapa de Infantil. Cremos que se pode evitar mantendo a mestra neste curso académico.
Como familias, preocúpanos e ocúpanos a Educación dos nosos fillos e fillas, dotalos da mellor bagaxe para o futuro. Por iso, andamos nestas, sen descanso desde final de curso, reclamando que non nos quiten a mestra de Infantil.
Por favor, señor conselleiro, aténdanos!
Anpa A Rabadela do C.E.I.P de Calo (Teo)
