O programa FALAMOS? de Andaina Pro Saúde Mental continúa a súa actividade no rural galego para mellorar a detección e intervención en risco de suicidio
Con motivo do Día Mundial para a Prevención do Suicidio, a asociación Andaina Pro Saúde Mental lembra a importancia de informar, detectar a tempo e intervir nunha problemática que aínda está rodeada de tabús.
O suicidio continúa a ser unha das principais causas de morte non natural en Galicia e, malia a súa relevancia, segue marcado polos mitos e os silencios que dificultan tanto a prevención como o acceso á axuda para quen a precisa. Romper con esas barreiras, ofrecer información clara, dar a coñecer os recursos dispoñibles e formar a profesionais e comunidade son pasos esenciais para reducir o estigma e previr situacións de risco.
Neste contexto, o programa FALAMOS?, un proxecto específico para a detección e intervención en risco de suicidio no ámbito rural e financiado pola Consellería de Sanidade, está a desenvolver en 2025 múltiples accións en concellos da área sanitaria de Santiago de Compostela e Barbanza.
A asociación Andaina Pro Saúde Mental vén impulsando este programa dende 2020 como unha aposta de achegamento a recursos e abordaxe integral da conduta suicida nas zonas rurais.
Ao longo deste ano, o programa FALAMOS? desenvolveu actividades de sensibilización en varios concellos. Así instaláronse puntos informativos permanentes que continúan activos en Padrón, Valga, Catoira, Rois, Ordes e Boqueixón, mentres que outros, como os colocados en Pontecesures, Trazo, Tordoia, Frades, no CIM da Mancomunidade de Ordes ou na Asociación AVANTE, foron retirados despois de estar operativos durante varios meses.
En canto aos puntos de lectura, segue en funcionamento o de Padrón e tamén estiveron dispoñibles nas bibliotecas de Boqueixón, Ordes e Frades. Ademais, en Padrón está prevista a celebración dunha mesa informativa antes de que remate o ano, e a entidade traballa xa na planificación de charlas de sensibilización para o último trimestre en varios dos concellos implicados.
Xunto con estas accións dirixidas á poboación en xeral, o programa tamén promove actividades de carácter máis formativo e preventivo. Así, no mes de maio realizouse un obradoiro de afrontamento en Boqueixón e está programado outro en Ordes neste mes de setembro.
O programa achegouse tamén ao ámbito académico, impartindo formación a estudantado dos graos de Psicoloxía e Enfermaría nas universidades de Santiago e Vigo respectivamente. Do mesmo xeito, reforzou o traballo con profesionais a través de accións formativas en colaboración coa mutua FREMAP e co Centro de Información á Muller de Boiro, contribuíndo a mellorar as súas capacidades para a detección e intervención en situacións de risco.
Con todas estas iniciativas, FALAMOS? busca ofrecer información accesible, reforzar os factores de protección fronte ao risco de suicidio e mellorar a preparación de profesionais e estudantado do eido sociosanitario, con especial atención ao medio rural, onde a dispersión xeográfica e o illamento social supoñen un reto engadido.
Neste 10 de setembro, Andaina Pro Saúde Mental pon o foco na necesidade de seguir ampliando accións de proximidade e redes comunitarias, lembrando que o suicidio pode previrse se se recoñecen os sinais de alerta, se se conta con apoios accesibles e se continúa reducindo o estigma que aínda pesa sobre esta realidade.
