Bisbarra, 14 de novembro do 2024 – A pantalla informativa situada na entrada da Casa do Concello de Ames sufriu unha pintada contra a empresa ALTRI.
Os feitos producíronse na madrugado do pasado día 12 e afectaron a pantalla led da fachada da casa consistorial de Ames cunha pintada que poñía “ALTRI NON”. O concello denunciou a acción diante da Garda Civil do Milladoiro.
Dende o goberno municipal condenan este acto incívico que suporá un gasto de 6.536,42 euros de fondos públicos da veciñanza de Ames. O alcalde vén de recibir a chamada de Marta Gontá, da Plataforma Ulloa Viva, que condena o acto vandálico.
O alcalde de Ames, Blas García, explica que “O que estou seguro é que a xente seria que está en contra de Altri non se dedica a facer estes atentados contra os bens públicos, que teñen pouco de reivindicativo e moito menos aínda de serio e responsable. Xa está posta a correspondente denuncia e oxalá se saiba quen foi o autor da pintada para que este acto non quede impune”.
Por outra banda o rexedor, que só recibiu a chamada da voceira popular, Oliva Agra, bota de menos unha condena unánime do acto por parte de todos os grupos municipais pois “o fin nunca xustifica os medios”.
Dende o Concello de Ames puxéronse en contacto coa empresa encargada da instalación e mantemento das pantallas informativas municipais, para solicitarlle un presuposto para arranxar a pantalla danada. Dende a empresa estiman o arranxo en 6.536,42 euros. Indican que a pintura que recibiu o módulo danou a máscara onde están situados os píxeles, iso provoca unha perda total de contraste no contido reproducido. Moitos dos píxeles non se poden salvar e por custes compensa a substitución dos módulos que compoñen a pantalla.
