Bisbarra, 21 de setembro do 2023 – O alcalde de Ames, Blas García, e o de Val do Dubra, Diego Díaz, abordaron a axenda de temas que afectan aos dous concellos e como afrontalos no futuro.
Na reunión, celebrada en Val do Dubra, participaron tamén a concelleira dubresa Celsa Oreiro e os concelleiros amesáns Susana Señorís e Gustavo Nieto. As estradas que unen aos concellos, o parque de bombeiros comarcal ou a xestión do turismo foron algúns dos temas tratados.
Blas García valorou de forma positiva a reunión pois entende que “Ames e Val do Dubra teñen un futuro en conxunto e hoxe trazamos os eixos que marcarán esta colaboración durante os próximos 4 anos”, mentres que Diego Díaz entende que a “a proximidade dos nosos concellos fai indispensable que manteñamos unhas boas relacións para o beneficio mutuo da veciñanza”.
Parque de bombeiros
A creación dun parque comarcal de Bombeiros que prestaría servizo a varios concellos, un proxecto que leva anos pendente e que consideran prioritario, García opina que “é un tema no que levamos moito tempo traballando e que temos que solucionar”. A este respecto, o alcalde de Val do Dubra, cualificou como prioridade a reactivación do diálogo entre as distintas administracións implicadas, e dicir, o Concello de Santiago, o Consorcio Provincial de Bombeiros, a Deputación da Coruña e a Xunta de Galicia para que a infraestrutura sexa realidade axiña.
Comunicacións
A mobilidade, tema capital para os municipios da área metropolitana de Santiago de Compostela foi un dos principais puntos da reunión, pois como apuntou García, “veciños de Santiago fan a súa vida nos distintos municipios da área metropolitana e veciños de Ames e Val do Dubra fan vida en Santiago. É necesario ofertar un servizo de calidade para que a xente opte por usar este tipo de trasporte público”. Díaz pola súa parte quixo salientar a necesidade de aumentar a frecuencia do transporte público metropolitano para que este se converta nun servizo real de calidade, “un servizo non ten que ser rendible, ten que facerlle máis fácil a vida da xente”.
Turismo
O turismo é un sector no que ambos alcaldes coinciden en que é necesario explotar de forma máis insistente, polo que neste mandato explorarán a viabilidade dun plan de turismo sustentable no que se tome como piar principal o río Tambre e que repercuta na hostalería e sector servizos da zona.
Entre outros temas tamén se falou da posibilidade de que ambos municipios compartan rede de saneamento nalgún punto da súa xeografía.
