Bisbarra, 27 de setembro do 2023 – O departamento de Cultura do Concello de Ames programa para o último trimestre do ano tres obras de teatro para o vindeiro mes de outubro.
As obras de teatro subiranse aos escenarios do Milladoiro e Bertamiráns, e diríxense a distintos segmentos de público. As entradas xa se poden atopar na Billeteira electrónica do Concello de Ames. Baby Esferic, O auto do Castromil e Apaga o candil son as propostas para o vindeiro mes.A programación cultural terá continuidade ata finais de ano co festival de maxia, FestiMax, durante a última fin de semana de outubro, e co festival de cinema infantil e xuvenil, Cinema Miúdo, no mes de novembro”.
Programación familiar
A primeira das obras é Baby Esferic, de Aboon Teatre, presentarase o día 6 de outubro no auditorio do Milladoiro. Realizaranse dous pases, ás 18:00 e ás 19:00 horas. Trátase dunha representación enfocada a crianzas de entre 6 meses e 3 anos, un espectáculo innovador de linguaxe visual que busca espertar a imaxinación de grandes e pequenos.
Os espectadores gozarán dunha viaxe con simpáticos habitantes esféricos que lles amosarán a maxia da terra, a ritmo de bebé. Tras a representación, que dura arredor de 30 minutos, as familias poderán gozar de 15 minutos de interacción e xogo coas personaxes.
Baby Esferic encádrase dentro do programa Camiño Escena Norte, un programa interactivo e cultural a través das artes escénicas entre Galicia, Cantabria, Euskadi e Navarra, e que o Concello de Ames alberga xunto con outros municipios galegos.
Oferta para público adulto
O auto do castromil, de Producións Teatrais Excéntricas terá lugar ese mesmo 6 de outubro, na Casa da Cultura de Bertamiráns, ás 20:30 horas. Trátase da obra, que foi merecedora do premio do III Certame Manuel María de Proxectos Teatrais.
A representación narra unha viaxe onírica a bordo dun coche de liña. Mentres os viaxeiros dormen, as maletas amotínanse, cobran vida e repasan a curiosa historia de Galicia. Empregando autos populares, combaten a amnesia colectiva, e contan a historia dun pobo que loita, é derrotado, que volve a levantar cabeza e que se rebela de novo. En definitiva, trátase dunha obra que emprega o humor e o espírito antroidesco para realizar unha viaxe pola Galicia inconsciente.
A última peza de teatro, Apaga o candil, é un espectáculo coproducido polo festival FIOT e por Contraproducións, e desenvolverase na Casa da Cultura do Milladoiro o 20 de outubro, ás 20:30 horas. Nesta obra, o dramaturgo Cándido Pazó achega ao público unha figura clave da tradición popular: Carlos “O Xestal”, un contador, músico e activista. O tempo da ficción dramática sitúase no intre no que “O Xestal” se atopaba entre a vida e a morte, antes de falecer aos 59 anos. A peza toma como punto de inspiración estrutural e argumental os clásicos contos da visita da morte. A representación está financiada pola Deputación da Coruña.
